नगरप्रमुख आक्रमण विरुद्ध जिल्ला प्रशासन ज्याकुथिइ धर्ना

येँ – मध्यपुर थिमि नगरपालिकाया प्रमुख मदनसुन्दर श्रेष्ठयात आक्रमण याःगु विरोधय् राजनीतिक दलया भातृ संगठनतय्सं जिल्ला प्रशासन ज्याकुथिइ धर्ना बिउगु दु । प्रमुख श्रेष्ठयात आक्रमण याःपिंत ज्वनेत माग यासें युवा संघ नेपाल, अखिल नेपाल महिला संघ, अनेरास्ववियु, जनप्रतिनिधि व स्थानीयवासिन्दां जिल्ला प्रशासनया ज्याकुथिइ धर्ना बिउगु खः ।

आक्रमणकारीतय्त याकनं ज्वनेमाःगु, जनतायात सुरक्षाया प्रत्याभूति बीमाःगु सुरक्षा व्यवस्था कडा यायेमाःगु थेंज्याःगु प्लेकार्ड सहित इमिसं धर्ना बिउगु खः । वंगु बैशाख ८ गते थःगु छेँय् दुहां वनेत्यंगु इलय् नगरप्रमुख श्रेष्ठ सांघातिक आक्रमणय् लाःगु खः । घटना जूगु तःन्हुमछि दये धुंकलं नं आतक नं आक्रमणकारीयात ज्वने फुगु धाःसा मदुनि ।

धर्ना लिपा प्रमुख जिल्ला अधिकारीया कार्यकक्षय् वनाः युवा संघ नेपालया केन्द्रीय नायः रमेश पौडेलं घटना जूगु तःन्हुमछि दये धुंकाः नं घटनाय् संलग्न जूपिंत ज्वने मफुगुलिं यानाः अपराधीयात थप मनोबल बीगु ज्या जक जूगु धासें एमालेया जनप्रतिनिधियात श्रृंखलावद्ध रुपं आक्रमण जुयाच्वंगु द्वपं बियादीगु दु ।

‘यदि सरकारं जनप्रतिनिधि व जनताया सुरक्षा बी मफु धइगु खःसा युवा संघ जनताया सुरक्षाया निंतिं सतकय् कुहां वयेत बाध्य जुइ’ वय्कलं धयादिल ।चाँगुनारायण नगरपालिकाया प्रमुख सोम मिश्रं सतक कालोपत्र जुयाच्वंगु अनुगमन यानाच्वनागु इलय् थःत नं मध्यपुर प्रमुखया थेंज्याःगु हालत याना बीगु ख्याच्वः वःगु धासें वय्कलं सुरक्षाया माग यानादीगु खः ।

अथे हे अखिल नेपाल महिला संघया अध्यक्ष नापं चाँगुनारायण नगरपालिकाया उपप्रमुख विना बास्तोलां घटना लिपा जनप्रतिनिधिं थप असुरक्षित जूगु महसुस यायेमाःगु धासें आः याकःबाकः जुइगु अवस्था मदुगु धयादिल । उगु इलय् प्रमुख जिल्ला अधिकारी द्रोण पोखरेलं आक्रमणकारीत म्हसीके धुंकूगु व सुलाच्वंगुलिं हे इमित ज्वने मफुगु खः धासें याकनं इमित ज्वनेत प्रतिवद्धता प्वंकादीगु खः ।