नेपाःयात कयाः संयुक्त राष्ट्र संघया असन्तोष

येँ – संयुक्त राष्ट्र संघं नेपाःया संक्रमणकालीन न्याय क्षेत्रय् जुयाच्वंगु ढिलासुस्तीयात कयाः असन्तोष प्वंकूगु दु । राष्ट्र संघं नेपाः सरकारयात संक्रमणकालीन न्यायया क्षेत्रय् जुयाच्वंगु ढिलाईयात कयाः थःपिनिगु ध्यानाकर्षण जूगु धासें पौ छ्वया हःगु खः ।

राष्ट्र संघीय मानव अधिकार उच्चायुक्तया ज्याकूया संयोजकत्वय् नेपालय् जबरजस्ती वेपत्ता सम्बन्धी कार्य समूह व विविध विषयया प्यम्ह विशेष दूतं जेनेभास्थित नेपाःया राष्ट्र संघीय स्थायी नियोगपाखें नेपाः सरकारयात उकथंया ध्यानाकर्षण पौ छ्वया हःगु खः ।

राष्ट्र संघस्थित नेपाली नियोगपाखें परराष्ट्रमन्त्री प्रदीप ज्ञवालीयात संबोधन यानाः उगु पौ छ्वया हःगु खः । करिब १० पेज ताःहाकःगु पती सत्य, निरुपण व मेलमिलाप आयोग व वेपत्ता यानातःपिं व्यक्तिया आयोगया पदाधिकारीया नियुक्तिया निंतिं नालेमाःगु विद्यमान प्रक्रियाय् निष्पक्षता, स्वतन्त्रता व पारदर्शिताया अभाव जूगु खँ न्ह्यथनातःगु दु ।

लिसें निगुलिं आयोगं प्रगति याये मफुगु जानकारी व थ्व सम्बन्धी विधेयकया सम्भाव्य संशोधनया बारे नं थःपिनिगु ध्यानाकर्षण जूगु खँ पती न्ह्यथनातःगु दु । राष्ट्र संघीय निकायं छ्वया हःगु पती आयोगं ख्वीस्वद्वः स्वयां अप्वः उजुरी दर्ता याःसां नं छगू हे उजुरीया समाधान पिकाये मफुगु धासें निगुलिं आयोगया व्यापक आलोचना यानातःगु दु ।