अफगानिस्तानय् बम आक्रमण

एजेन्सी – अफगानिस्तानया छगू सैन्य शिविरय् जूगु कार बम आक्रमणय् लानाः म्होतिं नं स्वीम्ह सुरक्षाकर्मीया ज्यान वंगु दु । अफगानिस्तानया पूर्वय् लाःगु गजनी प्रान्तय् थ्व आक्रमण जूगु खः । थ्व घटनाय् लानाः थप नीम्ह घाःपाः जूगु खँ धाःगु दु । अफगानी सुरक्षाकर्मीयात लक्षित यानाः जुयाच्वंगु लिपांगु छुं आक्रमण मध्ये थ्व छगू तःधंगु आक्रमण जूगु खँ धाःगु दु । थ्व आक्रमणय् प्रान्तीय परिषद्या प्रमुखयात हे निशाना दयेकूगु खः, तर वय्कः आक्रमणय् बचे जुइत ताःलाःगु दु । थौंकन्हय् अफगान सरकार व तालिवान लडाकु दथुइ कतारया दोहाय् जुयाच्वंगु शान्ति वार्ता प्रगति पाखे न्ह्याः वनाच्वंसां छुं ई न्ह्यवनिसें अफगानीस्तानय् धाःसा हिंसा अप्वयावःगु दु ।