
येँ(नेपालभाषा टाइम्स)÷भाषा साहित्य मुँज्या खलः सक्वया ग्वसालय् जूगु छगू ज्याझ्वःया दथुइ नेपालभाषाया स्वम्ह वरिष्ठ साहित्यकारपिंत नेवाः हना सिरपाः लःल्हाःगु दु । वंगु शनिवाः सक्वय् जूगु छगू ज्याझ्वःया दथुइ उगु सिरपाः लःल्हाःगु खः । उगु हे ज्याझ्वलय् निम्ह साहित्यकारया प्यंगू सफू नं पितब्वज्या याःगु खः ।
खलःया नायः रञ्जन श्रेष्ठया सभापतित्वय् न्ह्याःगु ज्याझ्वलय् मूपाहांकथं जनकवि दुर्गालाल श्रेष्ठ झायादीगु खः । खलःपाखें बिया वयाच्वंगु थुगु सिरपाः ताःई न्ह्यःनिसें दिनाच्वंगु खःसा थुगुसी छक्वलं स्वम्ह साहित्यकारपिंत लःल्हाःगु खः । ज्याझ्वलय् नेपालभाषा साहित्यया नांजाःम्ह वरिष्ठ आख्यानकार मथुरा साय्मि, वरिष्ठ आधुनिक कवि डा. योगेन्द्र प्रधान व वरिष्ठ समालोचक नापं बाखं च्वमि नर्मदेश्वरमान प्रधानयात उगु सिरपाः लःल्हाःगु खः ।
पुरस्कारपाखें सम्मानित व्यक्तित्वपिंत मूपाहां जनकवि श्रेष्ठं हनापौ व सिरपाःया दातामध्ये छम्ह राजदास श्रेष्ठं दोसल्लां न्ययेकादीगु खःसा खलःया नायः श्रेष्ठं पुरस्कार वापतया नीद्वः तका दां लःल्हानादीगु खः ।
नेपाल संवत् १११५ निसें नेपाल संवत् ११३० तक निरन्तर रुपं बिया वयाच्वंगु थुगु सिरपाः नेपाल संवत् ११३१ निसें धाःसा दिनाच्वंगु खः । शुरु झिद्वः तकाया थुगु सिरपाः थुगुसीनिसें नीद्वः याःगु खः । ज्याझ्वलय् थुगुसीनिसें थुगु सिरपाः हाकनं निरन्तर रुपं बिया वनेगु नं जानकारी बिउगु खः ।
ज्याझ्वलय् पुरस्कृत व्यक्तित्वपिं आख्नकार साय्मिया म्हसीका मूल्यांकन समितिया दुजः प्रा. पे्रमशान्ति तुलाधर व प्रधानद्वय या म्हसीका समालोचक नापं च्वमि पूर्णकाजी ताम्राकारं बियादीगु खः ।
उगु हे ज्याझ्वलय् खलःया दुजःलिसें साहित्यकार व च्वमि डा. बालगोपाल श्रेष्ठं च्वयादीगु निगू सफू ‘जिगु दापु ः जिगु धापू’ व ‘नेपालय् जातीय पहिचान व भाषिक समान अधिकारया न्ह्यसः’ वय्कःया जहानलिसें साहित्यकार श्रीलक्ष्मी श्रेष्ठं च्वयादीगु निगू सफू एल्फ्यस (चिनाखँ मुना सफू) व जीवनया लँपुइ (बाखं मुना सफू)या नं पितब्वज्या याःगु खः । थुपिं सफू मूपाहां जनकवि दुर्गालाल श्रेष्ठ व नेवाः न्ह्यलुवा, समालोचक नापं नेपालभाषा एकेदेमिया भाइस चान्सलर मल्ल के. सुन्दरं मंकाःकथं पितब्वज्या यानादीगु खः ।
पितब्वज्या जूगु सफूयात कयाः विशेष पाहां मल्ल के. सुन्दर व डा. ज्योतिप्रभा तुलाधरं समीक्षा यानादीगु खः । सफूयात कयाः च्वमि डा. श्रेष्ठं नं थःगु नुगःखँ तयादीगु खःसा सक्वया भाषाह्यमि राजदास श्रेष्ठ, नेपाल प्रज्ञा प्रतिष्ठानया प्राज्ञ लक्ष्मी मालीं नं थःथःगु नुगःखँ तयादीगु खः । अथे हे ज्याझ्वलय् खलःया दुजः ई. श्याम श्रेष्ठं नं थःगु नुगःखँ तयादिसें सिरपाःया निरन्तरता बीत अक्षय कोषया निंतिं न्यागू लख तका दांया चेक नं लःल्हानादीगु खः ।
खलःया दुजः ज्ञानेन्द्रलाल सिंह लसकुस यानादीगु उगु ज्याझ्वलय् आख्यानकार साय्मिं थनिं निदँ न्ह्यः उपन्यासया ख्यलय् न्हूपिं मिसापिं पित हयेगु ल्याखं ग्वसाः ग्वःगु उपन्यास च्वज्या धेंधेंबल्लाः कासाय् उत्कृष्ट जुयादीम्ह साहित्यकार श्रीलक्ष्मी श्रेष्ठयात हनापौलिसें नीन्याद्वः तका दां नं सिरपाः नं लःल्हानादीगु खः ।
LEAVE YOUR COMMENTS