छेँथुवाः प्रधानया पक्षय् नेवाः जातीय खलः पुचः
- नेपालभाषा टाइम्स
- ???? ??????? द्वादशी
- किपा-किपा - राजाराम तण्डुकारया फेसबुकपाखें साभार
येँ – जातीय भेदभाव यानाः दलितयात क्वथा बालं मबिउ धइगु द्वपनय् प्रहरी हिरासतय् लाःम्ह मय्जु सरस्वती प्रधानया समर्थनय् यलया थीथी जातीय खलः पुचःत दना वःगु दु । यलया थीथी जातीय खलः पुचःया प्रतिनिधितय् दथुइ म्हिगः ज्यापु समाजया ज्याकुथी जूगु छगू मुँज्यां मय्जु प्रधानया समर्थनय् वक्तव्य पिकायेगु व माल धाःसा सतकय् वयाः आन्दोलन समेत यायेगु निर्णय याःगु दु ।
जातीय खलः पुचःया वर्तमान संयोजक कथं रंजितकार समाजं सःतूगु उगु भेलाय् मय्जु प्रधान विरुद्ध तःगु थ्व मुद्दा स्वनिगःया समग्र नेवाःतय्गु हे विरुद्ध याःगु प्रहार खः धइगु ठहर यासें थुकियात मंकाः कथं प्रतिकार यायेमाःगु खँ पिहां वःगु खः । सुं नं मनूयात छेँय् बालं तयेगु वा मतयेगु धइगु छेँथुवाःया मानव अधिकार जूगु कारणं अज्याःगु खँयात जातीय विभेद धइगु नामय् मुद्दा तये मदइगु खँ नं भेलाय् पिहां वःगु खः । राज्यपाखें यानातःगु थीथी विभेदं यानाः थौं छेँय् बालं तयाः जीवन गुजारा यायेमाःगु नेवाःतय्गु बाध्यता जुयाच्वंगु खँ न्ह्यथँसें भेलाया वक्तातय्सं नेवाःतय्गु थ्व आय स्रोतय् समेत आक्रमणया कुतः जूगु निन्दनीय खः धकाः बिचाः तयादीगु खः ।
भेलाय् सहभागी जुयादीम्ह नेवाः अभियन्ता राजाराम तण्डुकारं ‘नेपालभाषा टाइम्स’यात जानकारी बियादीकथं थज्याःगु हे समस्या यलया छेँथुवाःतय्त नं मवयेमा धकाः आः हे सतर्क जुइगु निंतिं यल महानगरपालिकाया मेयर व यलया सीडीओयाथाय् वनाः ज्ञापनपत्र बीगु निर्णय नं भेलां याःगु दु ।
थ्वहे झ्वलय् प्रहरी हिरासतय् लानाच्वंम्ह मय्जु प्रधानयात कन्हय् त्वःतेगु खँ जुयाच्वंगु सीदुगु दु । उकिया लागिं कानून व्यवसायी नरेश श्रेष्ठ लगायतया पुचः सक्रिय जुयाच्वंगु दु । यदि वय्कःयात कन्हय् तक नं मत्वःतल धाःसा कंस स्वनिगःया नेवाःतय्सं सतकय् प्रदर्शन यायेगु तयारी यानाच्वंगु खँ सीदुगु दु ।
मय्जु प्रधान नेपाःया मिसा फुटबलया पुलांम्ह राष्ट्रिय कासामि खः । वय्कः नांजाःम्ह पत्रकार रमा सिंह, प्रहरी अधिकृत किरण वज्राचार्यपिंलिसे फुटबल म्हितीम्ह खः ।
वय्कः विरुद्ध मुद्दा तःम्ह पत्रकार रुपा सुनार जात व्यवस्था उन्मुलन मोर्चा, नेपाल नांगु संस्थाया बागमती–गण्डकी सम्पर्क समितिया संयोजक जुयाच्वंगु खँ सीदुगु दु । उगु समिति वैज्ञानिक समाजवादी पार्टी नांगु छगू पार्टीया भातृ संगठन खः । उगु समितिं सुनारया समर्थनय् पिकाःगु वक्तव्यय् वय्कःयात ‘कमरेड’ धकाः सम्बोधन यानातःगु दु ।
LEAVE YOUR COMMENTS