विराट पूर्ण वैद्य सिरपाःया निंतिं १० गू लखया अक्षय कोष

ख्वप(नेपालभाषा टाइम्स)÷विराट नेपालभाषा साहित्य सम्मेलन गुथि (विराट गुथि)या ग्वसालय् थुगुसी जूगु ख्वीछक्वःगु विराट नेपालभाषा साहित्य सम्मेलनया झ्वलय् नेपालभाषाया आधुनिक गद्य कविताया न्ह्यलुवा मदुम्ह पूर्ण वैद्यया नामं अक्षय कोष स्वनेगु ज्या जुल । वंगु कौलाथ्व द्वादशकिुन्हु जूगु सम्मेलनय् मदुम्ह कवि वैद्यया जहान मिरा शाक्य वैद्यं झिगू लख तका दांया ‘विराट पूर्ण वैद्य सिरपाः’या निंतिं उगु अक्षय कोष स्वनादीगु खः ।

नेपालभाषा साहित्यया ख्यलय् ज्वःमदुगु योगदान बियादीम्ह छम्हेसित निदँय् छक्वः छगू लख तका दांया सिरपाः बीगु ल्याखं उगु अक्षय कोष स्वनादीगु खः । लिसें उगु इलय् वय्कलं विराटया छेँ दनेत निगू लख तका दां नं आर्थिक ग्वाहालि यानादीगु खः ।

देशय् पंचायती क्रुर शासनया इलय् जनताया खँ च्वयेगु, ब्वनेगु, न्यनेगु, न्यंकेगु् मौलिक अधिकार शासन सत्तां क्वत्यलातःगु इलय् जनतायात थःगु खँ साहित्यया माध्यमं न्यंकेगु तातुनाः ने.सं. १०८२ लय् विराट नेपालभाषा साहित्य सम्मेलन गुथिया पलिस्था यानाः उगु इलंनिसें विराटं नेपालभाषा साहित्य सम्मेलन याना वयाच्वंगु खः ।

विराट गुथिया नायः महेन्द्रगोपाल कर्माचार्यया सभापतित्वय् न्ह्याःगु ज्याझ्वलय् मूपाहांकथं वरिष्ठ साहित्यकार हितकरवीर सिंह कंसाकार झायादीगु खः । नेपाः देय् व नेवाः राष्ट्रिय गान हायेकाः न्ह्याःगु ज्याझ्वलय् विराटया न्वकु महेन्द्रलाल कायस्थं लसकुस यानादीगु खः ।

विराटया छ्याञ्जे प्रदीपरत्न शाक्यं न्ह्याकादीगु ज्याझ्वलय् करिब स्वीन्याम्ह साहित्यकारं थःथःगु साहित्यिक रचना पाठ यानादीगु खः । ज्याझ्वलय् पाठ याःगु रचनामध्ये चिबाखं विधाय् नरेश अमात्य न्हाप, ज्ञानीराजा मानन्धर लिउ व रत्नकाजी महर्जन ‘लूनिभाः’ लियांलिउ लाःगु खः । अथे हे चिनाखँपाखे रामेश्वर मिश्रण श्रेष्ठ, दिलकुमारी डंगोल व ज्ञानेन्द्ररत्न वज्राचार्य छसिकथं न्हाप, लिउ व लियांलिउ लाःगु खः ।

ज्याझ्वलय् पाठ याःगु रचनामध्ये उत्कृष्ट जूपिनिगु नां विराटया पुलांम्ह नायःलिसें साहित्यकार त्रिरत्न शाक्यं घोषणा यानादीगु खः । उगु हे ज्याझ्वलय् ने.सं. ११४२या दँय् एसइइ परीक्षाय् नेपालभाषा विषयय् दकलय् अप्वः ल्याः हयादीम्ह पूर्णिमा तुलाधर (जगतसुन्दर ब्वनेकुथि)यात न्याद्वः तका दां व दसिपौलिसें नेपालभाषा पदकं छाय्पिउगु खः ।

सम्मेलनय् जुजुकाजी रंजित, वीरप्रसाद भंसारी, गुज्ये मालाकार, पवित्र कसाः हरिसुन्दर लाखे श्रेष्ठ, मैया महर्जन लगायतं म्येँ न्यंकादीगु खःसा विराटया ख्वाःपौ ‘ह्याउँबाला’या ३० गूगु ल्याःया चिखिफ्यनेज्या नं याःगु खः ।

विराटया दांभरिं रामगोपाल चौगुथिं सुभाय् देछानादीगु खः ।

सम्बन्धित बुखँ

LEAVE YOUR COMMENTS