प्याखंम्वः, भाषा सेवी गणेश साय्मियात हना

येँ(नेपालभाषा टाइम्स)- स्वांछपु बालाचः¥हे खलःपाखें नेपालभाषा दबू प्याखं ख्यःया नांजाःम्ह निर्देशकलिसें कलाकार गणेश साय्मियात हनेज्या याःगु दु । खलःपाखें बालाचःर्‍हे नखःया झ्वलय् लाकाः वय्कःयात हनेज्या याःगु खः।

खलःया नायःलिसें पुलांम्ह १७ वडाअध्यक्ष विजयबहादुर मालीया सभापतित्वय् वय्कलं हे लसकुस यासें न्ह्याःगु ज्याझ्वलय् जनगायक भृगुराम श्रेष्ठं म्येँ न्यंकादीगु खः ।
ज्याझ्वलय् मूपाहांकथं झायादीम्ह येँ मनपा १७ वडाअध्यक्ष नविन मानन्धरं खलःया दांभरिंतकं जुयाच्वनादीम्ह गणेश साय्मियात स्वांमाः क्वखायेकाः हनापौ देछानादीगु खः ।

खलःया दुजः योगेन्द्रमान श्रेष्ठं सम्मानित व्यक्तिया जीवनी व हनापौ ब्वनाः न्यंकादीगु खःसा सिद्धार्थ मालीं खलःयात न्याद्वः तका दां आर्थिक ग्वाहालि यानादीगु खः ।
समाजसेवा नापं त्वाःबहाःयापिनिगु हरेक ज्याखँय् उसिं मचासे थौं ७७ दँया ज्याथःगु वैंशय् नं उतिकं ग्वाहालि यायेत न्ह्यचिला च्वनादीगुलिं वय्कःयात उकथं हनेज्या यानागु खलकं जानकारी बिउगु दु ।

सम्मानित व्यक्तित्व साय्मि, वडाअध्यक्ष मानन्धरं नुगःखँ तयादीगु ज्याझ्वलय् खलःया संरक्षक नारायणभक्त श्रेष्ठलिसें ज्यासना पुचःया दुजःपिं व त्वाःबहाःयापिनिगु उपस्थिति दुगु खः ।