सामुदायिक स्कुलय् नं बहाल कर म्हइगु

येँ – येँ महानगरपालिका. सामुदायिक विद्यालयपाखे नं बहाल कर म्हइगु जूगु दु । सम्पत्ति बालंबियाः आय आर्जन यानाच्वंगु सामुदायिक विद्यालययात १० प्रतिशत पुलेत येँमनपां इनाप याःगु दु । येँ महानगर दुने ८९ सामुदायिक विद्यालय दु, गुकि मध्ये ५९ माध्यामिक व ३०

आधारभूत विद्यालय खः ।
येँया आपालं धयाथें मू सतकय् च्वंगु विद्यालयं बालंबियाः आम्दानी यानाच्वंगु खनेदुगुलिं येँ मनपां बहाल कर म्हयेगु तयारी याःगु खः । येँया थँबही च्वंगु जुद्धोदय मावि, लैनचौरया शान्तिगृह मावि, बाँसबारीया बासबारी मावि, प्रदर्शनी मार्गय् च्वंगु पद्मोदय मावि, डिल्लीबजारया कन्या माविलगायत विद्यालयं सतकय् लाःगु पसः बालं बियाच्वंगु खनेदयेवं येँ मनपां बहाल कर म्हयेगु ज्या न्ह्याकेत्यंगु खः ।

उकथं हे छुं छुं सरकारी कलेजं नं बालंबियातःगु दुसा उमित नं बहाल कर पुलेत येँ मनपां इनाप याःगु दु । तर येँ मनपायाके गुलिं विद्यालयं बालं बियातःगु तथ्यांक मदुगुलिं न्हापां तथ्यांक कायेगु ज्या न्ह्याकीगु जूगु दु ।