न्हूदँ ११४० समारोह समितिया नायः रमेश महर्जन

येँ – नेपाल संवत् ११४० न्हूदँ हनेगु निंतिं नीस्वंगु नेपाल संवत् न्हूदँ राष्ट्रिय समारोह समिति ११४० या नायः कथं नांजाःम्ह उद्योग व्यवसायी भाजु रमेश महर्जनयात ल्यःगु दु । नेपाल संवत् ११४० न्हूदँ समितिया दुजः मुँज्यां वय्कःयात सर्वसम्मतं नायः ल्यःगु खः ।

म्हिगः जूगु दुजः मुँज्याय् भाजु महर्जनयात न्हूम्ह नायः ल्ययेवं निवर्तमान नायः सत्यभामा माथेमा व न्हूदँ समारोह सल्लाहकार समितिया कजि लक्ष्मीदास मानन्धरं वय्कःयात खादा क्वखायेकाः भिंतुना बियादीगु खः । न्हूम्ह नायः महर्जनं नेपाल संवत्यात सम्मान जुइ कथं थीथी ज्याझ्वः याना वनेगु बचं बिसें हनेबहःपिनि सुझाव कथं ज्या याना वनेगु खँ नं कनादिल ।

नायः महर्जन नांजाःम्ह उद्योग व्यवसायीया नापं नेपालमण्डल टेलिभिजनया नायः व तःभुखाय् लिपा सम्पदा संरक्षणया निंतिं यलया पिलाछेँ पुनःनिर्माण समितिया नायः जुयाः ज्या यानादीम्ह खः । मुँज्यां न्हूदँया लसताय् जुइगु थीथी ज्याझ्वलय् नेपालभाषा मंकाः खलःया नायःयात विशेष पाहां कथं ब्वनेगु निर्णय नं याःगु दु ।