उपकुलपति बारे थज्याःगु हल्ला !

येँ – थौंकन्हय् सामाजिक सञ्जाल ज्या कायेमाःपिं मनू–तय् लागिं वरदान साबित जूसां ज्या मदुपिं मनूतय् लागिं धाःसा म्वाः मदुगु हल्ला यायेगु साधन नं जुयाच्वंगु दु ।

आः नकतिनि हे सामाजिक सञ्जालय् अज्याःगु हे छगू म्वाःमदुगु सुचं तयाः मध्य पश्चिमाञ्चल विश्वविद्यालयया उपकुलपति डा. नन्दबहादुर सिंह मंत धकाः हल्ला याना बिल । विश्वविद्यालयया केन्द्रीय कार्यालयया लेटर हेडय् च्वयाः जारी यानातःगु उगु सुचनय् प्रशासन अधिकृत दिनेग गौतमया हस्ताक्षर यानातःगु दु ।

सुचनय् उपकुलपति सिंहया अण्डकोषं भौचां वांन्याना बिउगुलिं घाःपाः जूगु व लिपा अस्पताल यंकाच्वंबलय् वय्कः लँय् हे मदुगु धकाः उल्लेख यानातःगु दु । थ्व घटनां यानाः विश्वविद्यालय प्रशासन तसकं चिन्तित जुयाच्वंगु दु धकाः नं सुचनय् धयातःगु दु ।

थ्वयां लिपाया झ्वः धाःसा फय्गं पहः वयेक च्वसें धयातःगु दु, ‘वय्कःया दाहसंस्कार वय्कःया हे जन्मस्थान कालिकोटय् जुइ । वय्कः हानं पुनजीर्वित जुयाः थःगु दाहसंस्कार जुमपाखें या धकाः पत्रकार सम्मेलन यायेफु ।’

विश्वविद्यालयया लेटर हेडय् हे थज्याःगु सुचं पिहं वःगुलिं थुकिं आपालं मनूतय्त भ्रमित नं याना बिउगु दु । सुचं फय्गं धकाः पत्ता लगे जुइधुंकाः थज्याःगु आपत्तिजनक ज्या याःपिं मनूतय्त प्रहरीं मालाच्वंगु खँ धाःगु दु ।

थ्व फर्जी ज्या याःपिं मनूतय्सं विश्व–विद्यालयया लेटरहेड हे नकली दयेकाः उकी अधिकारीया ल्हाःचिं तकं नकली तयाः सार्वजनिक याःगु खँ धाःगु दु । विश्वविद्यालयया उपकुलपति थेंज्याःम्ह विशिष्ट मनूया बारे थज्याःगु हास्यास्पद ज्या याःम्ह मनूयात ज्वन धाःसा वयात कानून कथं कडा कारवाही यायेगु खँ नं धाःगु दु । घटनायात कयाः प्रहरीइ उजुरी दर्ता जुइधुंकूगु दु ।

सम्बन्धित बुखँ

LEAVE YOUR COMMENTS