मेट्रो एफएमया वार्षिकोत्सवय् महयात सम्मान

येँ(नेपालभाषा टाइम्स)-येँ महानगरपालिकां न्ह्याका वयाच्वंगु मेट्रो एफएम २४ दँ क्यंगु लसताय् वंगु शुक्रवाः छगू ज्याझ्वः जुल । मेट्रो एफएमया २३ क्वःगु वार्षिकोत्सव कार्यशाला गोष्ठि व हनेज्या याःगु खः ।

येँ महानगरपालिकाया प्रमुख बालेन्द्र शाहया प्रमुख आतिथ्यताय् जूगु ज्याझ्वलय् कलाकारिता ख्यःपाखें बिउगु योगदानयात कयाः लोकंह्वाःपिं कलाकारद्वय मदनकृष्ण श्रेष्ठ व हरिवंश आचार्य (मह जोडी)यात विशेष हनेज्या याःगु खः । वय्कःपिं निम्हेसितं म्हतिं ५१ हजार तका दां व हनापौ देछासे सम्मान याःगु खः ।

ज्याझ्वलय् नवासें ख्यालिजुजु मदनकृष्ण श्रेष्ठं व्यक्तिं शासन यायेगु पद्दतिया अन्त्य यानाः विधिया शासन कायम यायेत इनाप यानादिल । वय्कलं महानगर प्रमुख शाहं लिपांगु इलय् न्ह्याकादीगु गतिविधिइ नागरिकया नं ग्वाहालि दु धासें नागरिकं बिउगु मतयात आत्मसात यानाः न्ह्याः वनेत इनाप यासें भिंतुना नं बियादीगु खः ।

अथे हे कलाकार हरिवंश आचार्यं देय्या राजधानी दुगु महानगरया नगरपित जुइगु सामान्य खँ मखु धासें मतदाता व आम नागरिकया अपेक्षा कथं ज्या यायेत सुझाव बियादिल ।

येँ महानगर प्रमुख शाहं थम्हं छुं न्हूगु ज्या यायेगु स्वयाच्वनागु व व हे सोचकथं ज्या नं यानागु खः धासें थुकी सकलें नगरवासीया ग्वाहालि आवश्यक दु धयादिल । लिसें वय्कलं एफएमया कर्मचारीतय्त इमान्दार जुयाः ज्या यायेत नं निर्देशन बियादिल ।