मलेसियाया पूर्वप्रधानमन्त्री नजिव रजाक भ्रष्टाचारय् दोषी ठहर

एजेन्सी – मलेसियाया पुलांम्ह प्रधानमन्त्री नजिब रजाकयात लखौं डलर भ्रष्टाचारया मुद्दाय् दोषी ठहर याःगु दु । भ्रष्टाचार सम्बन्धी थीथी मुद्दाय् न्हापांगु फैसला न्यंकुसें अदालतं वया विरुद्ध तयातःगु न्हय् गुलिं अभियोगय् दोषी ठहर याःगु खः । रजाकं आपराधिक प्रयोजनया निंतिं विश्वासघात याःगु, सम्पत्ति शुद्धिकरण व अख्तियार दुरुपयोग थेंज्याःगु अभियो गयात अस्वीकार याना वयाच्वंगु खः ।

थ्व फैसलायात मलेसियाय् कानुनया शासन स्थापना यायेत व भ्रष्टाचार नियन्त्रणया कुतलय् महत्वपूर्ण परीक्षा कथं कयातःगु खः । मलेसियाया वनएमडीबी नांया कोष अपचलन याःगु काण्डं विश्वन्यंकं जुयाच्वंगु जालसाजी व भ्रष्टाचारयात न्ह्यःने हयाबिउगु खः । उच्च अदालतया न्यायाधीश मोहमद नज्लान मोहमद गजलीं फुक्कं प्रमाणया आधारय् रजाक दोषी जूगु फैसला न्यंकूगु खः ।

मंगलवाः जूगु फैसलाय् सरकारी कोषपाखें तत्कालिन प्रधानमन्त्रीया निजी खाताय् चार करोड २० लाख रिङ्गिट (थ्यंमथ्यं छगू करोड अमेरिकी डलर) सरे याःगु विषयलिसे सम्बन्धित खः । सन् २००९ निसें २०१८ तक प्रधानमन्त्री जूम्ह रजाकं थःम्हं भ्रष्टाचार मयानागु धासें थःत थः आर्थिक
सल्लाहकारतय्सं झुके याःगु दावी यानाच्वंगु दु । रजाकं थःत आः फरार जुयाच्वंम्ह झो लुं भ्रमय् लाकूगु धया वयाच्वंगु दु । नजिबयात हरेक अभियोगय् १५ निसें २० दँ तक जेल सजाँय जुइफु । निदँ न्ह्यव हे रजाकयात देय् त्वःता वनेत प्रतिबन्ध तःगु खः ।