लाखे संरक्षणय् भोजपुरया ल्याय्म्हत

येँ(नेपालभाषा टाइम्स)- भोजपुरया ल्याय्म्हत लाखे प्याखं संरक्षण, संवद्र्धन यायेगु ज्याय् न्ह्यचिउगु दु । नेवाः समुदायया कला संस्कृतियात पुस्तान्तरण यानाः दीर्घकालीन रुपय् उकियात संरक्षण याना तयेगु उद्देश्यं लिपांगु इलय् भोजपुरया ल्याय्म्हत लाखे प्याखं संरक्षण यायेगु ज्याय् न्ह्यचिउगु खः ।

भोजपुर लाखे समाजया नायः विनम श्रेष्ठं विशेष यानाः भोजपुरय् च्वंपिं नेवाः समुदायया मौलिक सांस्कृतिक प्याखंया रुपय् दुगु लाखे प्याखंया संरक्षण यायेगु ज्याय् स्थानीय ल्याय्म्हत सक्रिय जूगु खँ कनादिल । गुंलाथ्व पंचमि (नागपंचमि)निसें न्ह्याइगु थनया लाखे प्याखं कृष्णाष्टमिया कन्हय्कुन्हुतक क्यनेगु याइ ।

समाजया नायः श्रेष्ठया कथं आधुनिकतालिसें पुलांगु मौलिक संस्कार, संस्कृति कला लोप जुइगु अवस्थाय् थ्यनाच्वंगु इलय् आः वयाः छथ्व ल्याय्म्हत पुस्तान्तरणया निंतिं प्रशिक्षण बीगु ज्याय्तकं न्ह्यचिउगु वय्कलं कनादिल ।

कला संस्कृति हस्तान्तरण यायेगु ज्या मजूगुलिं पहिचान हे लोप जुइगु अवस्थाय् थ्यंगु स्थानीय दीपेन्द्र श्रेष्ठं कनादिल । आः वयाः स्थानीय ल्याय्म्हत संस्कृति संरक्षणय् सक्रिय जूगुलिं परम्परा ल्यनाच्वनीगु खँय् आशा यायेथाय् दया वःगु
वय्कःया धापू दु ।