ख्वपय् पुलुकिसि जात्रा
ख्वप(नेपालभाषा टाइम्स)÷येँयाःपुन्हिया दकलय् लिपांगु न्हि बुधवाः थन पुलुकिसि जात्रा पिथंगु दु । थन येँयाःया दकलय् लिपांगु न्हि पुलुकिसि जात्रा पिथनेगु चलन दुसा थुकिया नापनापं येँयाः जात्रा नं क्वचाःगु कथं कायेगु यानातःगु दु ।
थनया लाकुलाछेँ त्वालं शुरु जूगु पुलुकिसि जात्रा बुलुचुा, नासमना, वंशगोपाल, इताछेँ, खौमा, ख्वप लाय्कू, भोलाछेँ, महालक्ष्मीस्थान, थालाछेँ, गःछेँ, सुजमरि, तचपाः, इनाचो, ग्वःमरि, तिबुक्छेँ लगायतया थासय् चाःहिइकूगु खः ।
पुलुकिसि जात्रा स्वयां न्ह्यः बलिसहित पुजा याःगु खः । जात्रा पिथने न्ह्यः बलिसहितया पुजा यायेमाःगु चलनकथं गुथि संस्थान ख्वपपाखें उकथं पुजा याःगु खः ।
स्वर्गया जुजु इन्द्रया बाहन ऐरावतया प्रतीक पुलुकिसि जात्राया झ्वलय् थीथी त्वालय् थ्यंकाः वा नकेगु मि पंकेगु, तुंया लः त्वंकेगु याःगु खः ।
पुलुकिसि जात्रा पिथने न्ह्यः पुजा यायेधुंकाः स्थानीय तेखाचो त्वाःया साय्मितय्सं यांमत पिथंगु खः । स्थानीय भैलः द्यःया देगलं सुकुन्दा च्याकाः बुलुचास्थित चखुंचा फल्चां छज्वः यांमत पिथंगु खः ।
पुलुकिसि जात्रा नगरया बछि स्वयां अप्वः थासय् चाःहिलेधुंकाः मूपात्रया जात्रा नं पिथंगु खः । मूपात्र जात्रा नं भैलःद्यःया मूलुखां पिथनेगु परम्परा दया वयाच्वंगु दु ।
LEAVE YOUR COMMENTS