न्ह्यज्या खलःया ६१ क्वःगु वार्षिकोत्सव

थिमि (नेपालभाषा टाइम्स)- न्ह्यज्याः खलः थिमिया ६१ क्वःगु बुदिं थीथी ज्याझ्वःयासें हन । मध्यपुर थिमि नगरया हे छगू जक ऐतिहासिक संस्था खलःया ६१ क्वःगु वार्षिकोत्सवया लसताय् साहित्यिक व सांस्कृतिक ज्याझ्वः यासें हंगु खः ।

खलःया नायः दामोदर श्रेष्ठया सभापतित्वय् थनया ऐतिहासिक निगू पुखुलिइ जूगु ज्याझ्वःया उलेज्या मूपाहांकथं झायादीम्ह नेवाः आन्दोलनया न्ह्यलुवा, नेवाः देय् दबूया संरक्षकलिसें नेपालभाषा एकेदेमिया उपकुलपति मल्ल के. सुन्दरं त्वाःदेवाय् मत च्याकाः यानादीगु खः ।

ज्याझ्वलय् नवासें मूपाहां मल्ल के. सुन्दरं धयादिल, ‘झीपिं भाषा, कला, संस्कृति व सांस्कृतिक रुपं तःमि जूगुलिइ हे अझं न्हाय् धस्वाकाच्वना । झी नीति निर्माण यायेगु थासय् तक थ्यंकेगुलिं न्ह्याबलें लिउने हे लानाच्वंगु दु । झीसं झीगु भाषा, जाति, संस्कृति व पहिचानया निंतिं आपालं आन्दोलन यायेधुंगु दु, अय्नं झी न्ह्याबलें लिउने हे लानाच्वंगु दु ।’

‘झीसं दँय्दसं थुकथंया सांस्कृतिक ज्याझ्वः, साहित्यिक ज्याझ्वः यानाः जनचेतना थनेगु नापं भ्वय् नयेगु व प्याखं हुलेगु ज्या यानाच्वना । छु झीगु समस्या थज्याःगु हे जक ज्या यायेवं समाधान जुइगु खः ला ?’ वय्कलं थःगु असन्तुपष्टि प्वंकादिल ।

लिसें वय्कलं आः प्रत्येक छेँखां भाय् नवायेगु व स्यनेकने याना वनेगु नापं थःगु अधिकारया सदुपयोग याये सयेका वनेमाःगु खँय् नं बः बियादिल ।
ज्याझ्वलय् बागमति प्रदेश सांसद राजेन्द्रमान श्रेष्ठ, मध्यपुर थिमि नगरपालिकाया निवर्तमान प्रमुख मदनसुन्दर श्रेष्ठं भिंतुना न्वचु तयादीगु खः ।
विराट गुथिया पुलांम्ह नायःलिसें साहित्यकार त्रिरत्न शाक्य, गुथिया न्वकु महेन्द्र कायस्थलिसें ओम नरहरी साहु श्रेष्ठ, नविनप्रकाश श्रेष्ठ, वसन्त नकःमि, तेजकृष्ण श्रेष्ठ, प्रदीप जामनः श्रेष्ठं चिनाखँ ब्वनाः न्यंकादीगु ज्याझ्वलय् हुलाप्याखं व सांगीतिक प्रस्तुति नं न्ह्यब्वःगु खः ।

मध्यपुर थिमिइ नेपाल कम्युनिष्ट पार्टीया संस्थापक बैकुण्ठहरी साहु श्रेष्ठं निरंकुश तानाशाही पंचायती व्यवस्था विरुद्ध सः थनेत ने.सं. १०८२ सालय् नीस्वनादीगु खलःपाखें वंगु खुगू दशक न्ह्यवंनिसें निरन्तर रुपं प्रगतिशील साहित्यिक व सांस्कृतिक ज्याझ्वः याना वयाच्वंगु दु ।