क्यानाडाय् न्हापांखुसी नेवाः झ्वःभ्वय्

येँ(नेपालभाषा टाइम्स)- क्यानाडाय् न्हापांखुसी तःजिगु नेवाः झ्वः भ्वय्या ग्वसाः ग्वःगु दु । क्यानेडियन नेवाः गुथिया ग्वसालय् व गुथि अन्तर्गतया मिसा पुचःया सक्रियताय् न्हापांखुसी उगु झ्वः भ्वय् जूगु खः ।

गुथिया नायः प्रकाश प्रधानं भ्वजय् झायादीपिं पाहांपिंत लसकुस यासें वय्कलं गुथिपाखें नेवाः संस्कृति व संस्कारया थीथी पक्षयात कयाः जानकारी बीगु झ्वलय् थुगुसी गुथिपाखें नेवाः भ्वय्या ग्वसाः ग्वयागु जानकारी बियादीगु खः ।

मिसा पुचःलिसें भ्वय् ग्वसा कवःया कजि रञ्जना सैंजुं नेवाः संस्कृतिया संवद्र्धन व संरक्षण यायेगु उद्देश्यं थुकथं परम्परागत नेवाः नसा ज्वलंया जानकारी बीगु ल्याखं क्यानाडाय् न्हापांखुसी नेवाः झ्वःभ्वय्या ग्वसाः ग्वयागु जानकारी बियादिल । लिसें वय्कलं थज्याःगु विषययात वइगु दिनय् नं निरन्तरता बिया वनेगु निंतिं ल्याय्म्ह पुस्ताय् पुस्तान्तरण याना वनेगु ज्याझ्वःया उद्देश्य जूगु नं स्पष्ट यानादिल ।

थौंकन्हय् क्यानाडाय् च्वँच्वनादीम्ह नेवाः देय् दबूया निवर्तमान नायः नरेश ताम्राकारं विदेशय् नं नेवाः परम्परायात ल्यंका तयेगु ल्याखं गुथिं थुकथंया ज्याझ्वः याःगु खँय् च्वछायादिसें नेवाः संस्कृति व संस्कारया संरक्षण व संवद्र्धनया निंतिं सकलें छप्पँ जुइमाःगु खँ कनादिल ।
नायः प्रधानं आर्थिक ग्वाहालि, स्वयंसेवकलिसें सांस्कृतिक ज्याझ्वः न्ह्यब्वयादीपिंत हनेज्या नं यानादीगु ज्याझ्वलय् न्वकु उत्तम माकजुं भ्वजय् दुगु थीथी परिकारया नसाज्वलंया बारे कनादीगु खः ।

गुथिया सांस्कृतिक छ्याञ्जे सुरेन्द्रलाल श्रेष्ठं नेवाः नखःचखः, जात्रा, पर्व व थीथी इलय् नइगु नसाज्वलंया क्वातुगु स्वापू दुगु चर्चा यानादीगु ज्याझ्वलय् सचिव सुमन रघुबंशीं ज्याझ्वः ताःलाकेत आर्थिक लिसें थीथी कथं ग्वाहालि यानादीपिं सकसितं सुभाय् देछानादीगु खः ।

परम्परागत रुपय् नेवाः भ्वजय् छसरा, निसरा व स्वसराय् दइगु सकतां परिकार नकेगु ज्या जूगु ज्याझ्वःया दकलय् लिपांगु ब्वय् सांस्कृतिक ज्ययाझ्वः नं न्ह्यब्वःगु खः । सांस्कृतिक ज्याझ्वलय् रञ्जना सैंजू, डा. अमर सैंजू, उत्तम माकजुया पुचलं सितारय् राजमतिया धुन न्यंकादीगु खःसा रुहिना महर्जनं कुमारि चचा प्याखं, राजेन्द महर्जनं धिमय् प्याखं न्ह्यब्वयादीगु खःसा कृशा महर्जन, रुपा महर्जन, प्रिशा प्रजपति, प्रीति कोजुया पुचलं हुलाप्याखं न्ह्यब्वयादीगु खः ।

अथे हे टोरन्टो विश्वविद्यालयय् वज्रयोगिनीया विषयय् पीएचडी यानाच्वनादीम्ह क्यानेडियन नागरिक एम्बर मूरं चचा प्याखं, सुरेन्द्रलाल श्रेष्ठं लाखे प्याखं न्ह्यब्वयादीगु खः ।