असं, वटु, लगं, महाबौद्ध लागा बन्द

येँ (नेपालभाषा टाइम्स) – येँ मनपाया वडा नं. १२ व २१ य् कोरोना संक्रमण जूपिं मनूत लुइवं अन म्हिगः अत्यावश्यक पसः बाहेक मेगु फुक्कं बन्द याःगु दु ।

गार्मेन्ट व्यवसायी संघया अध्यक्षयाके हे कोरोना संक्रमण जूगु लुइवं अन दुगु वसःया होलसेल पसः फुक्कं बन्द यायेमाःगु खँ १२ वडा वडाध्यक्ष विकास डंगोलं ‘नेपालभाषा टाइम्स’ यात कनादिल । म्हिगः १२ व २१ वडाया मंकाः बैठकं उगु लागाय् दुगु पसः बन्द याकेगु निर्णय याःगु खः । बैठकया निर्णय कथं वासः पसः व न्हिथं उपभोग यायेमाःगु सामान बाहेक मेगु पसः बन्द यायेगु निर्णय जूगु खः । म्हिगः पसः बन्द याकेगु झ्वलय् निगुलिं वडाया जनप्रतिनिधि व महानगरीय कालिमाटी प्रहरी वृत्त व जनसेवा प्रहरी वृत्त नं दुथ्याःगु खँ नं वडा अध्यक्ष डंगोलं कनादिल ।

उकथं हे म्हिगः येँ वडा नं. २२ य् लाःगु वटु व महाबौद्धया पसः नं पूर्ण रुपं बन्द जूगु दु। उगु लागाय् कोरोना संक्रमित जूपिं लुया वयेवं म्हीगंनिसें अन पसः बजाः बन्द याःगु खः । वडापाखें पसः बन्द यायेगु निर्णय याःसां गुलिखे पसल्यातय्सं धाःसा पसः चायेकाच्वंगु खः । अथे हे म्हिगः वडा नं. २७ य् लाःगु असं, भोताहिति लागाय् नं पसः बजाः बन्द याःगु खः ।

२२ वडा लागाय् च्वंपिं स्थानीय मनूतय्त थौं पीसीआर परीक्षण यायेगु ज्या जुइत्यंगु दु। परीक्षणया लिच्वः वयेकाः जक अन पसः चायेकीगु खँ दु ।