पीपीजी युके लन्दनया गुँभ्वय्

येँ(नेपालभाषा टाइम्स)÷पासा पुचः गुथि युके लन्दनया ग्वसालय् थःगु वार्षिक ज्याझ्वःकथं छगू तःजिगु गुँभ्वय् जुल । वंगु जुलाई ९ तारिखकुन्हु उगु गुँभ्वय् पार्लियामेन्ट हिलय् जूगु खः ।

बेलायतया थीथी थासय् च्वनाच्वंपिं सछि स्वयां अप्वःसिया सहभागिता दुगु थीथीकथंया नसाज्वलं लिसें नेवाः भ्वय्या विशेष व्यवस्था यानातःगु खः । दकलय् न्हापां कौलाकथं चटपटे व पास्तापाखें शुरु जूगु गुँभ्वजय् तुच्चाकथं स्यान्डविच व बहनि सकसितं मुख्य आकर्षणकथं न्ह्यइपुक थीथी घासासहितया नेवाः भ्वय् नकूगु खः ।

गुँभ्वय्या झ्वलय् न्ह्यइपुक थीथीकथंया कासा म्हितेगु नापं मेमेगु गतिविधि नं जूगु दकलय् न्ह्यइपुक व सकसिगु नुगः सालेकथं भुतिमालि ब्वयेकेगु नं ज्या जूगु खः । थुकथं हे यइपुक व न्ह्यइपुक मेमेगु कासा म्हितेगु झ्वलय् चम्चा दौड, फसि पाः वा लिसें बिंगो कासा नं म्हितकूगु खः ।
वा वयाच्वनीगु मौसमया इलय् न्यायेकूगु थुकथंया गुँभ्वजय् उकुन्हु मौसमं नं साथ बिउगुलिं सकसिनं तसकं न्ह्यइपुक ब्वति काःगु पासा पुचः गुथि, युके लन्दनं जानकारी बिउगु दु ।

पासा पुचः गुथि युकेया नायः सुशील प्रजापति, नेपाल चिकित्सक संघया पुलांम्ह नायः रमेश ख्वंजु व नेपाःया नांजाःम्ह म्येँ हालामि योगेश्वर अमात्यलिसें आपालं नेपाली समुदायया चर्चित व्यक्तित्वपिनिगु नं उपस्थिति दुगु खः ।

सम्बन्धित बुखँ

LEAVE YOUR COMMENTS