न्हूदँ समारोह समितिया पुलांम्ह नायः रमेश महर्जन मंत

येँ – नेपाल संवत् राष्ट्रिय न्हूदँ समारोह समितिया पुलांम्ह नायः व व्यवसायी रमेश महर्जन सोमवाः आकझाकां मंत । सोमवाः न्हिनय् कोरोनाया उपचार याकुयाकुं वय्कः मेडि सिटी अस्पतालय् मदुगु खः । वय्कः व वय्कःया जहान सरिता महर्जनयात खुन्हु न्ह्यः कोरोना जूगु खः । कोरोनां जुयाः निमोनियां जूगुलिं वय्कः मदुगु खँ सीदुगु दु । खुन्हु न्ह्यव जक वय्कलं फेसबुक मार्फत थः व थः जहानयात कोरोना जूगु जानकारी बियादीगु खः । वय्कःया जहानया रिपोर्ट नेगेटिभ वयेधुंकूगु खँ धाःगु दु ।

मदुम्ह महर्जनया अन्त्येष्टि कन्हय् पशुपतिइ याइगु खँ धाःगु दु ।

वय्कः ने.सं. ११४० व ४१ या न्हूदँ समारोह समितिया नायः जुयादीम्ह खः । वय्कः नेपाःया नांजाःम्ह हिरा व्यवसायी खःसा आरबी डाइमन्डया थुवाः खः । ताःई न्ह्यवनिसें हिरा व्यापारय् लगे जुयाच्वनादीसां वय्कः नेपालभाषा ख्यलय्, समाजसेवाय् व राजनीतिइ नं उतिकं सक्रिय जुयाच्वनादीम्ह खः । २०७२ सालया तःभुखाय् लिपा वय्कःया हे नेतृत्वय् यलया पिलाछेँय् हाउस पुलिङ्ग यानाः छेँ दनेगु ज्या न्ह्याःगु खः । अथेहे वय्कः विवेकशील साझा पार्टीया केन्द्रीय दुजः नं खः ।

भाजु महर्जनया काय छम्ह व म्ह्याय् निम्ह दी ।