थुगुसी नं पन्तिया जात्रा मजुइगु

येँ- कोरोना संक्रमण कारणं काभे्र जिल्लाया ऐतिहासिक नेवाः वस्ती पन्तिया जात्रा थुगुसी नं मजुइगु जूगु दु । कोरोना भाइरस संक्रमणया जोखिमया कारणं थुगुसी नं जात्रा दिकेगु निर्णय सरोकारवालातय् मुँज्यां याःगु खः ।

दँय्दसं तछलाथ्व पुन्हि (ज्यापुन्हि)कुन्हु जुइगु पन्तिया जात्रा थगुने नं कोरोना संक्रमणया जोखिमया कारणं मजूगु खः । जात्राया विषयय् पन्ति नगरपालिकालिसें जात्रालिसे सम्बन्धित सरोकारावालतय् दथुइ मुँज्या च्वनाः कोरोना संक्रमणया जोखिम कायम हे जूगुलिं जात्रा मयायेगु निर्णय याःगु खः ।

थगुने नं कोरोना संक्रमणया उच्च जोखिमया कारणं क्षमा पुजा जक यानाः सिधयेकूगु खःसा थुगुसी नं जात्राया दिंकुन्हु साधारण पुजा जक यानाः सिधयेकेगु कथं तयारी जुयाच्वंगु दु ।
पन्तिइ ज्यापुन्हिकुन्हु जात्रा जुइगु खःसां थन जुइगु जात्रा स्वन्हुतक जुइ । थन जुइगु जात्रा स्वयेत काभे्र जिल्लान्यंकं व स्वनिगःया थीथी थासं नं आपालं मनूत वयेगु याः ।

जात्रा धायेवं हे म्वः म्वः मनूत वइगु, दर्शनार्थी व भक्तजनतय् ल्याः नं उतिकं अप्वइगु जूगुलिं कोरोना संक्रमणया जोखिमयात ध्यानय् तयाः थुगुसी जात्रा यासे क्षमा पुजा जक यानाः सिधयेकेगुकथं तयारी जुयाच्वंगु दु ।

पन्तिया जात्राया इलय् वा वइ धइगु जनविश्वास दुसा जात्राया इलय् मुख्य रुपं महाद्यः, भद्रकाली व इन्द्रेश्वरया खः सालीगु चलन दु ।