क्यानडाय् मंकाः म्हपुजा व न्हूदँ ने.सं. ११४४ हन
येँ (नेपालभाषा टाइम्स)÷ क्यानाडाया एडमन्टन शहरय् च्वंपिं नेपाःमितय्सं वंगु नोवेम्भर १८ गते शनिवाः मंकाः म्हपुजा व नेपाल संवत् ११४४ न्हूदँ विशेष साँस्कृतिक ज्याझ्वः यानाः हन । साँस्कृतिक ज्याझ्वः नेवाः कल्चरल सोसाइटी अफ अलव्रताया ग्वासलय् एडमन्टन शहरया लायन्सडाउन कम्युनिटी हलय् जूगु खः ।
सांस्कृतिक ज्याझ्वःया उलेज्या सोसाइटीया नायः डा. हेमन्त जोशीं त्वाःदेवाय् मत च्याकाः यानादीगु खः । उबलय् वय्कलं नेपाल संवत्या प्रवर्तक शंखधर साख्वाःया किपाय् स्वांमाः क्वखायेकूगु खः ।
ज्याझ्वलय लसकुस यासें वय्कलं सांस्कृतिक ज्याझ्वलय् सहभागी सकसित म्हपुजा व न्हूदँ ने.सं. ११४४ या भिंतुना बियादिल । वय्कलं सोसाइटीया गतिविधिया नुगः खँ तसें क्यानाडाय् लाखे प्याखं, भैरव प्याखं, कुमारी प्याखं अले धिमे प्याखं ल्हुइकेगु ज्या दकलय् न्हापांखुसीइ सोसाइटी याःगु खँ कनादिल ।
म्हपुजा बारे नुगःखँ तसें वय्कलं थ्व सांस्कृतिक विश्वय् गनं मदुगु उत्कृष्ट सांस्कृतिक चलन खः धयादिल । अथेहे म्हपुजा न्हि कुन्हु शंखधर साख्वालं देशय् च्वंपिं गरिबतय्त ऋण मुक्त यानाः ११४३ दँ न्ह्यः नेपाल संवत् नीस्वनादीगु खँ न्ह्यथँसें विश्वय् देय्या नामं स्थापना यानातःगु छगू जक संवत् नेपाल संवत् जूगु खँ नं कनादिल ।
लसकुस लिपा मन्दः पुजा यासें म्हपुजा न्ह्याकूगु खः । थकालि नकिंपिंसं क्वखा, स्वांमाः, सिसाबुसा, मरि, मसला, खोसिं, स्यांगुलिं जाःगु किस्ति लःल्हानाः खेलुइताः च्याकाः ख्येँ सगं देछाःगु खः ।
म्हपुजा धुंकाः सकसितं भ्वय् नकूगु खः । म्हपुजा लिपा जूगु सांगीतिक ज्याझ्वलय् स्थानीय कलाकारपिंसं नेवाः म्ये, हुलाप्याखं, सारंगीया धुन न्ह्यब्वःगु खः ।
सोसाइटीपाखें म्हपुजा सम्बन्धी न्ह्यसःलिसः कासा यासें नेवाः सांस्कृतिक जागरणया कुतः नं जूगु खः । ज्याझ्वःया अन्तय् सोसाइटीया छ्याञ्जेपाखें म्हपुजा व न्हूदँ हनेत ग्वाहालि यानादीपिं सकसितं सुभाय् देछायादीगु खः ।
LEAVE YOUR COMMENTS