ज्यापु संस्कृति विकाष कोषपाखें चौताराया खलःपुचःयात बाजं लःल्हात

येँ (नेपालभाषा टाइम्स)÷ ज्यापु संस्कृति विकास कोषं सिन्धुपाल्चोकया चौताराय् च्वंगु सिन्धु नेवाः खलःया लिसें थीथी पुचःयात साँस्कृतिक बाजं लःल्हाःगु दु । कोषया उपाध्यक्ष सन्त कुमार महर्जनया कथं हार्मोनियम निगः, तबला निज्वः, पछिमा निगः, झ्याली न्यागू, मादल निगः ताः छज्वः लःल्हाःगु खः । कोषं थथे हे यानाः येँया ६३ गू त्वाः, थाहा नगरपालिका, ख्वप व भारतया सिक्कम लगायतया थासय् संस्कृति संरक्षण व सम्वद्र्धनया ताःतयाः बाजं लःल्हायेगु ज्या यायेधुंकूगु खँ उपाध्यक्ष महर्जनं कनादीगु दु ।

वंगु आइतवाः चौताराय् ग्वसाः ग्वःगु छगू ज्याझ्वःया दथुइ कोषया अध्यक्ष मंगलकृष्ण सिंह, उपाध्यक्ष सन्तकुमार महर्जन, ज्यापु महागुथि नेपाःया पदाधिकारीपिंसं सिन्धु नेवाः खलः, म्हसिका पुचः, भिंतुना मां पुचः व ज्योतिष परिषदयात बाजं लःल्हाःगु खः ।

ज्याझ्वलय् न्ववासें संस्कृति अभियन्ता धु्रव श्रेष्ठं तौराया नेवाः संस्कृति संरक्षण यायेगु निंतिं स्थानीय तहं स्वयाः स्वनिगःया नेवाः समुदायं हे अप्वः ग्वाहालि यानाच्वंगु खँ धयादिल । ‘थनया संस्कृति बचे यायेत थनया हे स्थानीय तहं प्रभावकारी भूमिका म्हिते फयाच्वंगु मदु, बरु स्वनिगःया नेवाः समुदायपाखें ग्वाहालि जुयाच्वंगु दु ।’

संस्कृतिकर्मी कुमार रंजितया समन्वयय् चौताराय् बाजं लःल्हायेगु ज्या जूगु खः । ज्याझ्वलय् न्ववासें सम्पदा संरक्षण गुथि चौताराया अध्यक्ष रविन्द्र श्रेष्ठं २०७२ सालया तःभुखाय् लिपा चौताराया कृष्ण मन्दिरय् दिनाच्वंगु हाकनं भजन सुरु यायेत स्थानीयतय्त निःशुल्क भजन प्रशिक्षण बिया वयाच्वनागु खँ कनादिसें आः वितरण याःगु बाजं नं भजन यायेत ग्वाहालि जुइगु खँ धयादिल ।

अथेहे म्हसिका पुचःया उपाध्यक्ष गुणकेशरी श्रेष्ठं थनया नेवाःतय्के नेवाः भाय् हे मवःगुलिं भाषा प्रशिक्षक नं छ्वयाहयाबीत कोषयात इनाप यानादिल ।

नेपालभाषा टाइम्स

च्वमिया मेमेगु

• ‘नुगः चफुना’ या म्यूजिक भिडियो पिदन
• नेपालभाषाया न्हूगु श्रृंखला वइगु
• एनपिएल ः जनकपुर व चितवन त्यात
• बौद्धविद्वान प्रजापतिया हना
• प्रधानमन्त्री ओलीया चीन भ्रमण, छुं न्हूगु सम्झौता मजुइगु