पोखराय् यःमरि महोत्सव व धेंधेंबल्लाः
कास्की (रासस)÷ पोखराय् यःमरि दयेकेगु कला पुस्तान्तरण यायेगु व मेगु समुदाययात नं यःमरि बारे जानकारी बीगु ताःतयाः यःमरि महोत्सव व धेंधेंबल्लाः जूगु दु । नेवाः मिसा पुचः कास्की ग्वसालय् पोखरा महानगरपालिका वडा नंं ४ लिसेया सहकार्यय् थ्व ज्याझ्वः जूगु खः । सोमवाः जूगु यःमरि दयेकेगु धेंधेंबल्लाखय् नीगू पुचलं ब्वति काःगु खँ नेवाः मिसा पुचः कास्कीया अध्यक्ष संगीता वज्राचार्यं कनादीगु दु । धेंधेंबल्लाखय् कर्माचार्य मिसा पुचः न्हाप जुयाः झिद्वः दां त्याकूगु दुसा जिरो मालेपाटन परुयाङ मिसा पुचलं ल्यू जुयाः न्हय्द्वः तका, बगर मिसा पुचलं लियांल्यु जुयाः न्याद्वः तका व शिशुवा मिसा पुचलं सान्त्वना पुरस्कार कथं स्वद्वः तका त्याकूगु खः । धेंधेंबल्लाखय् त्याःपिंत दसिपौ नं लःल्हाःगु खः ।
अध्यक्ष वज्राचार्यं थ्व महोत्वसं यःमरिया महत्व युवापुस्तायात थुइके बीगु निंतिं ग्वाहालि जूगु खँ कनादिल । वय्कलं धयादिल, ‘यःमरि पुन्हि कुन्हु न्हूगु वा क्यलाः दयेकातःगु जाकिचुं पाखें दयेकातःगु यःमरि पुज्यात धाःसा छेँय् गुबलें अन्नया अभाव जुइमखु धयागु जनविश्वास दु । थुकुन्हु यःमरिलिसें जाकिचुंया कुवेर, गणेश, लक्ष्मी लगायत थीथी द्यः दयेकाः भकारीइ तयाः पुज्यायेगु याइ । थथे पुज्यायेधुंकाः प्यन्हु लिपा जक द्यः क्वकयाः प्रसाद इनाः नयेगु याइ ।’
महोत्सवया संयोजक भवानी माकजुं यःमरियात वासःया कथं नं छ्यले ज्यूगु खँ कनादिल । ‘यःमरि वासः कथं नं नयेगु चलन दु । थुकी तयातःगु चाकु, हाम्वः, मले नं चिकुलां चिकुपाखें बचे यायेत ग्वाहालि याइ’ वय्कलं धयादिल ।
पोखरा महानगरपालिका ४ वडाया अध्यक्ष देवकृष्ण पराजुलीं वडा कार्यालयं कला व संस्कृति संरक्षणया निंतिं न्हापां निसें ज्या याना वयाच्वंगु धयादिसें यःमरि ल्यंकातयेगु निंतिं धेंधेंबल्लाःया ग्वसाः ग्वयागु खँ कनादिल । पोखराया पुलांगु बजाः ऐतिहासिक व मौलिकतां जाःगु बजाः जूगु धयादिसें वय्कलं यःमरियात पर्यटनलिसे स्वानाः संरक्षण यायेत महोत्सवं ग्वाहालि जूगु खँ धयादिल ।
नेवाः मिसा पुचः कास्कीं आः जिल्लाया सकलें दुजःपिंत यःमरि दयेकेगु स्यनेगु योजना दयेकातःगु दु । यक्वसिनं दयेके सल धायेवं थुकियात व्यावसायीकरण यानायंकेगु पुचःया ग्वसाः दु ।
LEAVE YOUR COMMENTS