गुथि अस्ट्रेलियाया साधारणसभा

येँ(नेपालभाषा टाइम्स)- अस्ट्रेलियाय् च्वंपिं नेवाःतय् पुलांगु संस्था गुथि अस्टे«लियाया न्हूगु ज्यासना पुचःया ल्यज्या याःगु दु । छुं दिं न्ह्यः जूगु साधारण सभां उमेश नापितया अध्यक्षताय् न्हूगु ज्यासना पुचःया ल्यज्या याःगु खः । गुथि अस्ट्रेलियाया नायः अनुप महर्जनया सभापतित्वय् जूगु साधारण सभाय् वय्कलं थःगु कार्यकालय् जूगु थीथी ज्याझ्वःलिसें हाथ्याया बारे जानकारी बियादीगु खः ।

थःगु नुगःखँ तयेगु झ्वलय् वय्कलं कोरोना (कोभिड–१९)या कारणं दिनाच्वंगु संस्थाया ग्वसालय् जुइगु भुतिमालि ब्वज्या (काइट फेस्टिभल)यात निरन्तरता बीगु नं जानकारी बियादिल ।

दांभरिं उमेश नापितं आर्थिक ल्याःचाः न्ह्यब्वयादिसें संस्थाया खाताय् जम्मा जुयाच्वंगु ध्यबायात थःगु कार्यकालय् अप्वयेकाः २० हजार डलर थ्यंकेगु प्रतिवद्धता नं प्वंकादिल । लिसें थःगु नेतृत्वया कार्यकालय् इहि मुना, म्हपुजा थेंज्याःगु नेवाः संस्कृति व संस्कारया ज्यझ्वः याना वनेगु नं जानकारी बियादिल ।

निवर्तमान दांभरिं नापितया अध्यक्षताय् नीस्वंगु न्हूगु ज्यासना पुचलय् विश्वास श्रेष्ठ न्वकु, सुबिन श्रेष्ठ मूछ्याञ्जे व अजय देशार दांभरिंलय् ल्यःगु दुसा आइटी सर्पोर्टय् जेनिश मास्के च्वनादीगु दु ।

थुकथं हे दुजलय् श्याम सैंजू, आरति शाक्य, सिजन ताम्राकार, कुन्दन ताम्राकार, प्रवेश डंगोल, संकल्प वज्राचार्य, आशिषमान सिं, सुरज प्रधान, निभाज मास्के आय्नी श्रेष्ठ महर्जन, कृष्ण शाक्य, बुकेश महर्जन, राजीव श्रेष्ठ, आभाष न्हुछे प्रधानयात ल्यःगु दु ।

निर्वाचित न्हूगु ज्यासना पुचःयात निम्फाया अध्यक्ष अरुण तामाङ, संस्थाया वरिष्ठ सल्लाहकारपिं डा. नारायण प्रधान व पदम शाक्यं संस्थां थःगु लक्ष्य प्राप्त याये फयेमा धासें भिंतुना बियादीगु खः ।

उगु इलय् गुथिया पुलांपिं नायःपिं महेन्द्र श्रेष्ठ, सगुन ताम्राकार, दिप्ता श्रेष्ठ, अनुप महर्जनयात विशेष सम्मान व निवर्तमान ज्यासना पुचःया सकल पदाधिकारी दुजःपिंत कदर पत्र लःल्हाःगु खः ।

सम्बन्धित बुखँ

LEAVE YOUR COMMENTS