क्यानेडियन तिपूया नेवाः परम्पराकथं इहिपा
येँ- क्यानाडाया टोरन्टो सहरय् च्वंपिं छज्वः क्यानेडेलि तिपुलिं नेवाः परम्पराकथं इहिपा याःगु दु । क्यानाडाया टोरन्टो विश्वविद्यालयय् नेवाः बौद्ध धर्मया थीथी पक्षयात कयाः अध्ययन अनुसन्धान याना वयाच्वंपिं निम्ह तिपुलिं नेवाः परम्पराकथं इहिपा याःगु खः ।
विश्वविद्यालयय् नेवाः बौद्ध धर्मया थीथी पक्षयात कयाः अध्ययन अनुसन्धान याना वयाच्वंम्ह पीएचडीया विद्यार्थी इयान टर्नर व अलाना सौजां नेवाः परम्पराकथं इहिपा याःगु खः । नेवाः संस्कारय् इहिपा यायेबलय् थें सकतां विधि पूवंकाः वय्कःपिंसं इहिपा यानादीगु खः ।
वय्कःपिनिगु नेवाः परम्पराकथं इहिपा यायेगुलिइ क्यानेडियन नेवाः गुथिलिसें आवद्ध नेवाःतय्सं दक्वं ग्वाहालि याःगु खः । नेवाः संस्कारय् इहिपा याये न्ह्यः मिजंपाखें भम्चायाथाय् ग्वय् छ्वयेगु चलनकथं टर्नरं सौजाया छेँय् कोतः सहित लाखामरि, मरिचरि, सिसाबुसा, वसः, समाज्वलं छ्वःगु खः ।
अनंलि लँ स्वःवनेगु ज्याझ्वः जूगु खःसा थ्व झ्वलय् टर्नरयात वया मामं स्वांमाः क्वखायेकाः विदा बिउगु खः । टर्नरया छेँया लुखाय् नं च्वय् पंचबुद्धलिसें जवंखवं भत्तु, मिखा दुगु लसकुस ध्वाखाया किपा तिकातःगु खः । धिमय्, भुस्याः, ताः, बबू लगायतया नेवाः परम्परागत बाजंलिसें भम्चा कायेत वंपिंत मिसाया छेँजःपिंसं लसकुस याःगु खः ।
वयां लिपा स्वयम्बर यायेगु झ्वलय् गणेद्यः साक्षी तयाः इहिपा यानादीपिं निम्हतिपुलिं थवंथवय् स्वांमाः क्वखायेकाः अंगू न्ह्याकेगु ज्या याःगु खःसा अनंलि टर्नरं सौजायात सिन्चा फायेकादीगु खः । वयां लिपा टर्नरया अबुं भम्चायात ‘तुतिबग्गी न्ह्याकूगु खःसा भम्चा पित बिउगु इलय् सौजाया अबुं मोटरय् ‘दूफांगां’ फायेकादीगु खः ।
भम्चायात विदा बीधुंकाः गणेद्यः साक्षी तयाः सम्धी दथुइ खँल्हाबल्हा यायेग ज्या नं याःगु खःसा टर्नरया मामं नेवाः परम्पराकथं हे लुखाय् सिफं लुयाः भम्चा दुचायेकूगु खः । भम्चा दुचायेका ग्वय् सायेकेगु व निम्हतिपूयात थाय्भु नकेगु नं याःगु खः ।
क्यानेडियन तिपूया इहिपा ज्याझ्वलय् झायादीपिं पाहांपिं सकसितं नेवाः परम्पराकथं हे सकतां घासा तयाः झ्वःभ्वय् नकूगु खः ।
इहिपाया इलय् नेवाः संस्कारकथं छु छु यायेगु धइगु बारे गुथिया महासचिव विमलमान श्रेष्ठं जानकारी बियादीगु खःसा उकिया महत्व व अर्थ थुइकेगु ज्या उत्तम माकजुं यानादीगु खः ।
नेवाः संस्कारकथं आपालं विदेशीतय्सं इहिपा याःसां मुक्कं नेवाः संस्कारकथंया विधि पूवंकाः सुं नं विदेशीं थुकथं इहिपा याःगु सम्भवत थ्व न्हापांखुसी जुइमाः धइगु अनुमान याःगु दु ।
LEAVE YOUR COMMENTS