मेट्रो एफएमय् कन्हय् निसें नेपालभाषा अध्यापन

येँ (नेपालभाषा टाइम्स) – येँ महानगरपालिकां न्ह्याका वयाच्वंगु मेट्रो एफएम ९४.६ मेगाहर्जपाखें न्ह्यानाच्वंगु रेडियो दूर शिक्षा अन्तर्गत कन्हसंनिसें नेपालभाषा विषय नं अध्यापन शुरु जुइगु जूगु दु ।

कोरोना भाइरस संक्रमणया कारणं ब्वनेकुथि बन्द जुयाच्वंगु अवस्थाय् विद्यार्थीतय्त लक्षित यानाः येँ मनपा शिक्षा समितिया संयोजनय् मेट्रो एफएमपाखें रेडियो दूर शिक्षा संचालन याना वयाच्वंगु दु। वंगु जेठया लिपांगु वालंनिसें न्ह्यानाच्वंगु रेडियो दूर शिक्षा अन्तर्गत कन्हसंनिसें नेपालभाषा विषय नं अध्यापन शुरु जुइगु दूर शिक्षाया संयोजक रविना महर्जनं ‘नेपालभाषा टाइम्स’ यात कनादिल ।

येँ महानगरपालिकां स्थानीय पाठ्यक्रम तयार यायेधुंकूगु अवस्थाय् ब्वनेकुथि बन्द जुयाच्वंगुलिं आःयात रेडियोया माध्यमं दूर शिक्षा संचालन याना वयाच्वंगुलिं नेपालभाषा विषय नं अध्यापन याकेत्यंगु खः । संयोजक महर्जनं कनादीकथं कन्हय् मंगलवाः छगू तगिंया अध्यापन जुइ । आःयात वालय् प्यन्हु मंगलवाःनिसें शुक्रवाःतक नेपालभाषा विषय अध्यापन याकेगु कथं तयारी जुयाच्वंगु व लिपा थप याना यंकेगु नं वय्कलं कनादिल ।

वालय् प्यन्हु छगूनिसें खुगू तगिंतक नेपालभाषा विषय अध्यापन याकीगु जूगु दुसा थुकी मंगलवाः तगिं छगू, बुधवाः तगिं निगू व प्यंगू, विहीवाः तगिं न्यागू व शुक्रवाः तगिं छगू, स्वंगू व खुगूया नेपालभाषा विषय अध्यापन जुइ ।