क्यानेडियन नेवाःया आर्थिक योजनायात कयाः जनचेतनामूलक ज्याझ्वः

येँ(नेपालभाषा टाइम्स)- क्यानेडियन नेवाः गुथिया ग्वसालय् निवृत्त जीवन लिपाया आर्थिक योजनायात कयाः छगू सूचनामूलक ज्याझ्वः याःगु दु । गुथिं सेवा निवृत्त जीवनया लिपाया आर्थिक योजना विषययात कयाः उगु सूचनामूलक ज्याझ्वः याःगु खः । गुथिं ‘सेवा निवृत्त जीवनया निंतिं आर्थिक योजना’ बारे जानकारी बीगु ल्याखं उगु ज्याझ्वः ग्वसाः ग्वःगु खः ।

ज्याझ्वलय् स्रोत व्यक्तिलिसें मुख्य वक्ताकथं झायादीम्ह गुथिया पुलांम्ह छ्याञ्जे नापं सीपीए÷सीजीएलिसें आर्थिक विशेषज्ञ रविन प्रधानं सेवा निवृत्त जीवनयात सुविधाजनक व सरल यायेत आवश्यक रणनीति दयेकेमाःगु चर्चा यानादिसें निवृत्त जुइधुंकाःया जीवनया निंतिं फक्व अप्वः बचत यायेगु नीति अवलम्बन याना वनेमाःगु खँय् बः बियादिल लिसें वय्कलं आम्दानी अप्वयेकाः खर्च म्हो यायेगु, अप्वः ज्या यानाः लिबाक अवकास कायेगु, आर्थिक विज्ञ, सल्लाहकारलिसे सल्लाह कायेगु यानाच्वन धाःसा नं सेवा निवृत्त लिपाया जीवन सुखमय जुइ धयादिल ।

करमुक्त बैंक खाता, म्युचुअल फण्ड आदिया उचित प्रयोग यायेमाःगु खँय् बः बियदिसें वय्कलं निर्धारित उमेर स्वया न्ह्यः सेवा निवृत्त जुइबलय् पेन्सन नं म्हो जुइगुलिं ६५ दँया लिपा जक सेवा निवृत्त जुइगु व थथे जुल धाःसा अप्वः पेन्सन प्राप्त जुइगु जानकारी नं बियादिल ।

क्यानाडाय् ‘ओल्ड एज सेक्युरिटी’ अर्थात वृद्ध भत्ता क्यानाडाय् बसोबास याःगु आधारय् प्राप्त जुइगु व उकिया निंतिं उमेर गातकि सरकारपाखें स्वतः दर्ता याइगु जूगुलिं पेन्सन नं थः ज्या यानाच्वनागु ज्याकू व कम्पनीकथं धाःसा फरक जुइ धासें पेन्सन प्राप्तिया निंतिं आवेदन बीमाःगु जानकारी बियादिल ।

वय्कलं सेवा निवृत्त लिपाया जीवनया निंतिं आर्थिक सल्लाहकारलिसे सल्लाह कायेगु बुद्धिमतापूर्ण लक्ष्य निर्धारण यायेगु, कम्पनीया पेन्सनय् सहभागि जुइ लगायत थीथी १० गू बुँदाया सुझाव नं बियादीगु खः ।

गुथिया लिउ दांभरिं चन्दा श्रेष्ठं आर्थिक साक्षरता बारे थःगु प्रस्तुतीकरण न्ह्यब्यादिसें सहज व सक्षम जीवनया निंतिं आर्थिक पक्षया भूमिका महत्वपूर्ण जुइ धासें आर्थिक साक्षरता जुल धाःसा बजेटनिसें उत्पादनमूलक लगानी व आर्थिक रुपं जुइगु ठगी, झन्झट आदिपाखें नं बचे जुइ फइ धयादिल ।

सीपीए क्यानाडाया प्राविधिक ग्वाहालिइ आर्थिक साक्षरता ज्याझ्वः अन्तर्गत संचालन जूगु उगु ज्याझ्वलय् लसकुस यासें गुथिया मूछ्याञ्जे विमलमान श्रेष्ठं गुथिं, भाषा, कला, संस्कृति, परम्परागत ज्याझ्वः जक यायेगु मखसे समसामयिक विषयय् नं जानकारी बीगु ल्याखं थुकथंया ज्याझ्वः ग्वसाः ग्वयागु जानकारी बियादिल । ज्याझ्वः गुथिया नायः प्रकाश प्रधानया सभापतित्वय् जूगु खः ।

सम्बन्धित बुखँ

LEAVE YOUR COMMENTS