ने. सं. ११४४ कौलाथ्व पारू - नःलास्वनेगु

मनपाय् नेपालभाषाया पाठ्यक्रम पारित

येँ (नेपालभाषा टाइम्स) – येँ महानगरपालिकापाखें महानगर दुनेया फुक्कं स्कूलय् १ तगिंनिसें ८ तगिं तक ब्वंकीगु स्थानीय विषयमा पाठ्यक्रम पारित याःगु दु ।

शुक्रवाः च्वंगु महानगरपालिकाया शिक्षा समितिया बैठकं उकियात सर्वसम्मतं पारित याःगु खः । सरकारपाखें १ तगिंनिसें ८ तगिं तक ब्वंकीगु १०० पूर्णाङ्कया स्थानीय विषयया पाठ्यक्रम तयार यायेगु लिसें सफू छापे यायेगु तकया अधिकार स्थानीय तहयात बियातःगु दु। उगु हे अधिकार प्रयोग यानाः येँ मनपां ‘येँ देय् म्हसीका’ नांगु पाठ्यक्रम तयार याःगु खः । येँ देय्या म्हसीका बीगु विषय जूगुलिं उगु पाठ्यक्रम थनया स्थानीय भाषा नेपालभाषां ब्वंकेगु निर्णय येँ मनपां याःगु खः ।

उगु पाठ्यक्रम तयार यायेगु लागिं मनपां गठन याःगु पाठ्यक्रम समितिया संयोजक डा. चुन्दा वज्राचार्यं शुक्रवाः येँ मनपाया प्रमुख लिसें शिक्षा समितिया नं प्रमुख विद्यासुन्दर शाक्ययात थःपिनि प्रतिवेदन लःल्हानादीगु खः । शिक्षा समितिया बैठकं उकियात पारित याःगु खः । आः उगु हे पाठ्यक्रम लागू याकेगु लागिं मनपाया कार्यपालिका बैठकं निर्णय यायेगु ज्या जुइ । वयां लिपा येँ देय्या सामुदायिक व संस्थागत (निजी) फुक्कंस्कूलय् थ्व पाठ्यक्रम ब्वंकेगु ज्या जुइ ।

समितिया संयोजक डा. चुन्दा वज्राचार्यं कनादीकथं उगु पाठ्यक्रम कथं आः सफू (पाठ्यपुस्तक) च्वयेगु ज्या जुयाच्वंगु दु। सफू च्वयेगु ज्या नं अन्तिम चरणय् थ्यनाच्वंगु दु । शुक्रवाः च्वंगु शिक्षा समितिया बैठकं आः सामुदायिक स्कूलय् थ्व सफू ब्वंकेगु लागिं माःपिं शिक्षक छनौट यायेगु लागिं नं छगू समिति गठन याःगु दु।

अथे हे पाठ्यसफू तयार जुल धाःसा उकियात छापे यायेगु लागिं नं छगू समिति गठन याःगु दु। निगुलिं समितिया संयोजक मनपाया उपमेयर हरिप्रभा खड्गी श्रेष्ठ जुयादीगु खः । मनपा दुनेया फुक्कं सामुदायिक स्कूलय् थ्व पाठ्यक्रम ब्वंकेगु लागिं १३५ म्ह शिक्षक मालीगु खँ धाःगु दु मनपां सामुदायिक स्कूलतय्त पाठ्यसफू निःशुल्क बीगु तर निजी स्कूलतय्त धाःसा नमूना जक बीगु व उपिं थःपिंसं हे सफू छापे याये माःगु निर्णय नं याःगु दु ।