नाइजेरियाया विजयं अर्जेन्टिनाया आशा ब्वलन, ब्राजिल नं त्यात

एजेन्सी- आइसल्यान्डयात निगू गोलं बुकुसें नाइजेरियां अर्जेन्टिनायात राहत चूलाका बिउगु दु । शुक्रवाः जूगु कासाय् अहमद मुसां निगू गोल यायेवं नाइजेरियां आइसल्यान्डयात त्याकूगु खः । नाइजेरियाया थ्व विजयया कारणं अर्जेन्टिनाया नं निगूगु चरणय् वनीगु सम्भावना अप्वःगु दु । यदि नाइजेरिया विरुद्धया कासाय् त्याकेफत धाःसा अर्जेन्टिनायात निगूगु चरणय् वनेगु ह्वःताः चूलायेफु । न्हापांगु कासाय् अर्जेन्टिनायात बराबरीइ पंगु आइसल्यान्डयात क्रोएसियां नं बराबरीइ जक पन धाःसां अर्जेन्टिना निगूगु चरणय् वनी ।
नाइजेरियाया निंतिं शुक्रवाः मुसां कासाया ४९ औं व ७५ औं मिनेटय् छगू छगू गोल याःगु खः ।

मेखे कासा क्वचायेत्ययेका इन्जुरि इलय् याःगु निगू गोलया ग्वाहालिं कोस्टारिकायात बुकाः ब्राजिलं नं निगूगु चरणय् वनेगु लुखा चायेकूगु दु । कासाया ९१ औं मिनेटय् फिलिप कोउन्टिन्हों छगू गोल व ९७ औं मिनेटय् नेयमारं छगू गोल यासें थुगु विश्वकपय् ब्राजिलं विजय चूलाकूगु खः ।

थ्व विजय लिसें ब्राजिल समूह ई ४ अंकं कयाः शीर्षस्थानय् थ्यंगु दु । आः सर्बिया लिसे जुइगु कासा बराबरी जक यात धाःसां ब्राजिल नं निगूगु चरणय् वनीगु जुइ ।