दकलय् ल्ह्वंम्ह क्रिकेटर

भारत व वेस्ट इन्डिज दथुया निगू टेस्टया श्रृंखलाय् भारतं निगुलिं कासा त्याकाः श्रृंखला थःगु कब्जाय् लाकल । थ्व टेस्ट श्रृंखला त्याकेवं भारत टेस्ट राष्ट्रतय् धलखय् दकलय् च्वय् नं लात । थ्व श्रृंखला भारतं त्याकूसां थुकी म्हितूम्ह छम्ह न्हूम्ह कासामिया कारणं भारतया विजय हे छायाय् लात ।

वेस्ट इन्डिजया थ्व कासामिया चर्चा थौंकन्हय् सामाजिक सञ्जालय् व्यापक जुयाच्वंगु दु । वयागु किपा सामाजिक सञ्जालय् भाइरल जुयाच्वंगु दु । थ्व कासामि खः– रहकीम कर्नवाल । रहकीमया चर्चा जुयाच्वंगु कारण धाःसा वयागु म्हधिकः व ग्यसुया कारणं खः । २६ दँया रहकीम भारतलिसे थ्व श्रृंखलापाखें जक टेस्ट क्रिकेटय् डेब्यु याःगु खः ।

तर वयागु चर्चा डेब्युया कारणं स्वयां नं वयागु ग्यसुया कारणं अप्वः जुल । स्थानीय पत्रिकातय्सं धाःकथं रहकीमया ग्यसु तौल १४० किलो दु, अले व विश्वया दकलय् अप्वः तौल दुम्ह टेस्ट क्रिकेटर नं जूगु दु । खय्त ला अन्तर्राष्टिय काउन्सिलं स्थानीय मिडियाया थ्व दावीयात पुष्टि याःगु मदुनि, अथे खःसां यदि वयागु तौल धाथें १४० किलो खः धयागु खःसा व आःतकया दकलय् ल्ह्वंम्ह टेस्ट क्रिकेटर जुइ ।

आःतक टेस्ट क्रिकेट म्हितूपिं कासामितय्त तौलया ल्याखं स्वयेगु खःसा दकलय् ल्ह्वंम्ह कासामि जुयाच्वंम्ह धयाम्ह अस्टे«ेलियाया वरविक आर्मस्ट्रंग खः । तर आः रहकीमं आर्मस्ट्रंगयात नं लिउने लाकाबिउगु दु । रहकीमया तौल जक अप्वःगु मखु, वयागु उचाई नं स्वये लायकया दु । वयागु उचाई ६ फूट ५ इञ्च दु ।

रहकीम जव ल्हातं ब्याटिङ याइम्ह ब्याट्सम्यान खःसा अफ ब्रेक बलर नं खः । वं थःगु न्हापांगु टेस्टय् भारतया चेतेश्वर पुजाराया विकेट काल । वं टेस्ट क्रिकेटय् न्हापांगु विकेट कायेवं क्रिकेटया तथ्यांक तया वयाच्वंम्ह भारतया छम्ह रिपोर्टरं ट्विट याःगु दु ‘थ्व टेस्ट क्रिकेटया इतिहासय् दकलय् झ्यातुगु विकेट जुइमाः ।’

रहकीम टेस्ट क्रिकेटय् नकतिनि डेब्यु याःसां वेस्ट इन्डिजया घरेलु क्रिकेटय् धाःसा लोकंह्वाःम्ह हे कासामि खः । व यक्व छक्का थ्वायेफुम्ह कासामि खः, अले वयागु उचाईया कारणं वयागु स्पिन बल नं स्वयेबहः जुइगु याः । छुं ई न्ह्यव क्वचाःगु वेस्ट इन्डिज च्याम्पियनशीपय् रहकीमं १७.६८ या औसतय् ५४ गू विकेट काःगु खः ।

क्रिकेट वेबसाइट इएसपीएन क्रिकइन्फोया कथं रहकीमं न्हापांगु श्रेणीया ५५ गू कासाय् २४ या औसतय् २२२४ रन दयेकेधुंकूगु दुसा २६० विकेट कायेधुंकूगु दु । अथेहे टि २० कासाय् नं वयागु स्ट्राइक रेट १३१ स्वयां अप्वः दु ।

बांलाःगु प्रतिभा दुसां थःगु ग्यसुया कारणं हे रहकीम अन्तर्राष्ट्रिय क्रिकेटय् ह्वःताः चूलाके मफयाच्वंगु खः । वंगु दँय् जक वेस्ट इन्डिजया प्रमुख चयनकर्ता कर्टन ब्राउनं रहकीमया तौल म्हो याकेगु निंतिं ग्वाहालि जुयाच्वंगु खँ धाःगु दु । रहकीमया आदर्श धाःसा दक्षिण अफ्रिकाया अलराउन्डर ज्याक कलिस खः ।

सम्बन्धित बुखँ

LEAVE YOUR COMMENTS