पर्वतय् सापारु पर्व शुरु

येँ(नेपालभाषा टाइम्स)- पर्वत जिल्लाया कुस्मा बजारय् सापारु पर्व शुरु जूगु दु । पर्वतया कुस्मा बजारय् लाखे पिथनाः सापारुया पर्व शुरु याःगु खः ।

कोरोना संक्रमणया जोखिमयात ध्यानय् तयाः नेवाः संस्कृति व परम्परा ल्यंका तयेगु उद्देश्यं लाखे पिथनाः सापारु पर्व शुरु याःगु खः । थःथिति, इष्टमित्र, पासाभाइलिसें थः दिवंगत छेँजःपिंपाखें थन नं सायाः पिथनेगु चलन दया वयाच्वंगु दु ।

थ्व हे परम्पराकथं थन च्वंपिं नेवाःतय्सं बुधवाः लाखे प्याखं पिथनाः सापारु पर्व शुरु याःगु खः । थुगु दँय् दिवंगत जूपिं थः छेँजःपिंमध्ये अप्वःसिनं धइथें छेँय् छेँय् हे सायाः नखः हनेगु याःगु खःसा गुलिसिनं धाःसा सतकय् सायाः पिथनेगु नं याःगु स्थानीय सचिन्द्र श्रेष्ठं जानकारी बियादीगु दु ।

नेवाः समुदाय दुने पितृनाप स्वापू दया वयाच्वंगु थ्व नखः नेवाःत गन गन च्वना च्वंगु दु, अन अन थःगु हे चलनकथं सायाः पिथनेगु याना वयाच्वंगु दु । गुलिखे नेवाःत स्वनिगलय् वयाः च्वनाच्वंगुलिं थन नं सायाः पिथनेगु याइ ।

सचिन्द्र श्रेष्ठ