थनिंनिसें नेपाः–चीन एक्स्पो

यल – नेपाल चीन एक्स्पो–२०१८ थनिंनिसें यलया लाय्कु लागाय् सुरु जुइगु जूगु दु । न्यान्हुयंकं न्ह्याइगु एक्स्पो अरनिको सांस्कृतिक तथा व्यावसायिक प्रवद्र्धन समाजया ग्वसालय् जुइत्यंगु खः । बिहिवाः छगू पत्रकार सम्मेलन यासें समाजया अध्यक्ष अजरमान जोशीं व्यापार व संस्कृति संगमस्थल कथं थ्व एक्स्पो जुइत्यंगु खँ कनादिल ।

एक्स्पोया झ्वलय् थीथी चिनियाँ व नेपाली सामानया प्रदर्शनीया लिसें साँस्कृतिक ज्याझ्वः, फेसन शो नं जुइगु जूगु दु । थ्व एक्स्पोया झ्वलय् निगू देय् दथुइ मौलिक संस्कृति, परम्परा लिसें व्यवासायिक उत्पादनत आदान प्रदान यायेत ह्वःताः चुलाइगु खँ वय्कलं धयादीगु दु ।
अरनिको समाज व चीन नेपाल साँस्कृतिक आदानप्रदान केन्द्र खः ।

पत्रकार सम्मेलनय् न्ववासें चीन नेपाल साँस्कृतिक आदान प्रदान केन्द्रया अध्यक्ष लि चोङ लिं थःपिंसं थ्व एक्स्पोयात आर्थिक रुपं जक स्वयागु मखसे नेपाः व चीन दथुइ दुगु स्वापूयात जनस्तरं प्रगाढ यायेगु निंतिं यानाच्वनागु खँ कनादिल । सुथय् १० ताः निसें न्याताः ई तक न्ह्याइगु एक्स्पोय् ६० गू थीथी नेपाली व चिनियाँ सामानया स्टल दइगु खँ धाःगु दु । ग्वसाः खलकं निगू लाखं मल्याक स्वकुमित एक्स्पोय् वइगु अनुमान यानातःगु दु ।