चिडियाखानाय् जनावरया आकृतिया काष्ठकला

यल(नेपालभाषा टाइम्स)÷थनया जावलाख्यलय् च्वंगु सदर चिडियाखानाय् दुपिं जनावरया आकृति काष्ठकलाय् कीगु ज्या जुयाच्वंगु दु । आपालं कलाकारं चिडियाखानाय् दुपिं जनावरया आकृति अन हे च्वंपिं सिमाया सिँइ कीगु ज्या जुयाच्वंगु दु । कलाकारं जनावरया आकृति कीगु ज्या लिपा सिँया उगु कलाकृति सर्वसाधारणया प्रदर्शनया निंतिं तइगु जूगु दु ।

सिँइ कियातःगु अज्याःगु आकृति लः व निभालं बचे याये फइगु थाय् आवश्यक जूगुलिं अज्याःगु हे थासय् उकियात प्रदर्शनया निंतिं तयेगु चिडियाखानाया सूचना अधिकारी गणेश कोइरालां कनादीगु दु । वय्कलं कनादीकथं कलाकारं चिडियाखानाय् दुपिं काउलि (कछुवा), किसिया छ्यं, गोही, चिकंलापा, इमा आदि थीथी जीवजन्तुया आकृति सिँइ कीगु ज्या जुयाच्वंगु दु । थुकथं जनावरया आकृति दयेकाः प्रदर्शनय् तयेगु ज्यां चिडियाखाना अवलोकनया निंतिं वइपिं विद्यार्थीलिसें मेपिंत नं ग्वाहालि जुइगु विश्वास याःगु दु ।

कोरोना संक्रमण लिपा थौंकन्हय् चिडियाखाना अवलोकन यायेत वइपिनिगु ल्याः नं अप्वयाच्वंगु दु । चिडियाखानाया मुख्य आकर्षणया रुपय् धुँ, भालु, चितुवा, गोही, भुतिमाकः आदि खः । थन आपालं प्रजातिया जीवजन्तु दु । चिडियाखानां बिउगु जानकारीकथं थन थीथी जीवजन्तुमध्ये स्तनधारीया ३३ गू प्रजाति, झंगःपंछिया ६१ प्रजाति,, उभयचरया च्यागू प्रजाति, न्याया १७ गू प्रजाति दु । थुकथं हे लोप जुइगु अवस्थाय् थ्यने धुंकूगुया धलखय् लानाच्वंपिं ३८ दुर्लर्भ वन्यजन्तुमध्ये १५ गू यात चिडियाखानां संरक्षण यानाः तयातःगु दु ।