ने. सं. ११४४ कौलाथ्व दशमी - स्याक्वत्याक्व

पीदँ न्ह्यव तंम्ह नेपाःमियात कोलकताय् जेलय् लुइकल

येँ- नेपाःया इलामं तंम्ह छम्ह मनू पीदँ लिपा भारतया छगू झ्यारखनाय् लुइकूगु दु । पीदँ न्ह्यव तंम्ह मनू म्वाःम्वाकं लुइगु धयागु तसकं म्हो हे जक जुइ, तर २०३७ सालय् इलामं तंम्ह उम्ह मिजंयात भारतया कोलकता दमदम नांया झ्यारखाना (जेल)य् लुइकूगु खः ।

दिपक जैसी तिम्सिना नांया उम्ह मिजं तंबलय् २० दँया ल्याय्म्ह खः । तर वयात भारतया दार्जिलिङय् कर्तव्य ज्यानया मुद्दाय ज्वन । ज्वंगु पीदँ दयेधुंकूसां वयागु मुद्दाया सुनुवाइ धाःसा आःतकं जुइफुगु मदुनि । ज्यान मुद्दाय् दोषी ठहर हे मजुइक थुखें उखे, उखें थुखे झ्यारखानाय् सरुवा जुजुं है पीदँ दयेधुंकूगु खः ।

आः वइगु सोमवाः दिपकया पेशी दु । थ्व पेशीइ निर्दोष सावित जुल धाःसा दिपक नेपाः वयेखनीगु जुइ ।
तसकं गरिब परिवारय् बूम्ह दीपक छेँया अवस्था तसकं बांमलाःगुलिं ज्या यायेत दार्जिलिङ वंगु जुयाच्वन । छेँ नं तू मी धकाः इलामया मंगलबारे धाःथाय् वंम्ह व अनं तुं दार्जिलिङ वंगु जुयाच्वन ।

दीपक तंगु छुं दँ लिपा हे दार्जिलिङय् गोर्खाल्यान्डया आन्दोलन जुल । तंगु तःदँ तक नं लुइके मफुगुलिं छेँजःपिंसं दीपक नं गोर्खाल्यान्डया आन्दोलनय् लानाः सीधुंकल जुइ धयागु तायेका च्वंगु जुयाच्वन ।

दीपक कोलकाताया दमदम झ्यारखानाय् दुगु जानकारी वयेवं वंगु फागुन ८ गते काँकडभित्ताय् च्वनाच्वंम्ह दीपकया ककाया काय प्रकाशचन्द्रं विश्व सेवा मञ्च नांया छगू संस्थाया ग्वाहालिं कोलकताय् वंगु खः । अन दीपकयात नापलानाः थः हे दाजु खः कि मखु धकाः सीकेत छेँजःया बारे, थाय्बाय्या बारे न्यनेकने यानास्वःगु खः । दीपकं न्हापाया खँ बांलाक कंगुलिं थः हे दाजु जूगु धयागु सिइकाः घयपुनागु खँ प्रकाशचन्द्रं धागु दु ।

पीदँ तक जेलय् च्वनाच्वंम्ह दीपकया मानसिक अवस्था धाःसा कमजोर जुयाच्वंगु दु । ‘जिं नापलानाबलय् वयागु म्ह खानाच्वंगु दु, ग्याःचिकु पह वयेक म्वानाच्वंगु थें खनेदु,’ प्रकाशचन्द्र बिबिसीलिसे खँ ल्हासें धाःगु दु, ‘स्वघौ तक खँ ल्हायेधुंकाः बल्ल भचा सामान्य थें जुल ।’

अदालतं दीपकया मानसिक स्वास्थ्य जाँच यायेत आदेश बिउसां गुबलें हे उकिया रिपोर्ट अदालतय् पेश मजूगु खँ प्रकाशचन्द्र कंगु दु ।
झ्यारखानाय् नापलाःवंपिं वकिलतय्त दीपकं थः मांअबु, किजाया नां च्वयाः क्यंगु जुयाच्वन । थ्व हे आधारय् वया छेँजःपिंत मालेगु सुरु जूगु खः । थ्वलिपा कोलकताय् च्वंगु नेपाली महावाणिज्य दूतावासं दीपक दाजु खः कि मखु धकाः म्हसीकेत वयेमाल धकाः फोन याना हयेवं प्रकाशचन्द्र कोलकता वंगु खः ।

दीपक म्वानाच्वंगु दनि धयागु खं सकलें छेँजःपिं लय्तायाच्वंगु खँ दीपकया भिंचा लाःम्ह डा. डिएन फुयाँलं बिबिसीयात धाःगु दु । दीपक अबु मदयेधुंकल, मां धनमाया नं दनि । धनमायां न्हाय्पनं बांलाक मताः, अले ल्हाः छपा नं मदयेधुंकल । आः काय लिहां वइगु धयागु खबरं मांम्ह तसकं लय्तायाच्वंगु खँ फुयाँलं धयादीगु दु ।