दछिया दुने प्यसः आचारसंहिता उल्लंघन

येँ – प्रेस काउन्सिल नेपालं वंगु दछिया दुने पत्रकार आचारसंहिता उल्लंघनया मुक्कं ३९३ गू घटना जूगु जानकारी बिउगु दु । काउन्सिलया कथं थगुने फागुननिसें वंगु माघ तकया दुने १४९ गू उजुरी व काउन्सिल थम्हं याःगु स्वअनुगमया इलय् पत्रकार आचारसंहिता सम्बन्धी २४४ गू घटना जूगु दु । काउन्सिलं छगू विज्ञप्ती जारी यासें पत्रकार आचारसंहिता उल्लंघनया घटनाया बारे जानकारी बिउगु खः ।

काउन्सिलया सूचना अधिकारी दीपक खनालं बियादीगु जानकारीकथं छापामाध्यमय् ६७ गू उजुरी लाःगु दुसा १३ गू स्वअनुगमया झ्वलय् आचारसंहिता जूगु पत्ता लगे याःगु दु । अथे हे विद्युतीय संचारमाध्यमयात कयाः ८२ गू उजुरी लाःगु दुसा २३१ गू स्वअनुगमनय् लाःगु दु । उकीमध्ये काउन्सिलं छापामाध्यमया ६३ गू व विद्युतीय संचार माध्यमया १३६ गू यानाः १९९ गू मुद्दाया उजुरीया फछ्र्यौट याःगु दु ।

सूचना अधिकारी खनालं बियादीगु जानकारीकथं काउन्सिलं तःक्वः तःक्वः मौखिक, लिखित रुपं याःगु इनापयात अटेर याःगु धासें १६ गू स्वयां अप्वः आमसंचारमाध्यमयात अवज्ञाकारीया धलखय् तःगु दु । काउन्सिलं अवज्ञाकारीया धलखय् तःगु संचारमाध्यममध्ये अन्नपूर्ण पोस्ट, काठमाडौं टुडे अनलाइनलिसें स्वंगुलिं आचारसंहिता पालना यायेगु प्रतिवद्धता प्वंकूगुलिं अवज्ञाकारीया धलखं चिइकेत नं निर्देशन बिउगु दु ।

उखे गोरखापत्र न्हिपतिं आचारसंहिता पालना यायेगु प्रतिवद्धता प्वंकुसे पत्राचार याःगु काउन्सिलया विज्ञप्तीइ धयातःगु दु । आचारसंहिता उल्लंघन याःगु संचारमाध्यमयात वर्गीकरणय बीगु ल्याः क्वपालेगु, प्रेस पास निलम्बनया निंतिं सिफारिस यायेगु, लोककल्याणकारी विज्ञापनया भुक्तानी पनेत सिफारिस यायेगु याना वयाच्वंगु दु ।

सम्बन्धित बुखँ

LEAVE YOUR COMMENTS