पंचवीर सिंह सिरपाः लःल्हात
येँ- युवा बौद्ध समूहपाखें बुद्ध संवत् २५६४ या पञ्चवीर सिंह सिरपाः लःल्हाःगु दु । बुद्ध धर्म सम्बन्धी च्वसुया उत्कृष्ट च्वमियात बीगु उगु सिरपाः थुगुसी मदुम्ह माधवलाल प्रधानयात लःल्हाःगु खः ।
नेपालभाषा टाइम्स न्हिपती बुधवाःपतिकं दछियंकं पिहां वःगु बुद्ध धर्म सम्बन्धी उत्कृष्ट च्वसु च्वमियात उगु सिरपाः बीगु याना वयाच्वंगु खः । न्हिपती पिहां वःगु बुद्ध धर्मसम्बन्धी च्वसुमध्ये दँय्दसं उत्कृष्ट छम्ह मिसा व छम्ह मिजं च्वमियात उगु सिरपाः बीगु याना वयाच्वंगु खः । २५६४ दँय् मिसापिं च्वमि मदुगुलिं मिजंपिंमध्ये उत्कृष्ट च्वमिकथं मदुम्ह प्रधानयात उगु सिरपाः लःल्हाःगु खः । मदुम्ह प्रधानयात ‘जीवन अनित्य मृत्यु नित्य’ शीर्षकया च्वसुया निंतिं उगु सिरपाः लःल्हाःगु खः ।
समूहया नायः मदनबहादुर तुलाधरया सभापतित्वय् जूगु ज्याझ्वलय् मूपाहां वरिष्ठ संस्कृतिविद् डा. चुन्दा वज्राचार्यं मदुम्ह प्रधानया जहान मोहिनी प्रधानयात उगु सिरपाः लःल्हानादीगु खः । ज्याझ्वलय् दाता पञ्चवीर सिंह तुलाधरं दां सिरपाः लःल्हानादीगु खः । ज्याझ्वलय् प्यक्वःगु ईलोह पञ्चवीर परियत्ति सिरपाः मय्जु निभाः शिल्पकारयात लःल्हाःगु खः ।
ज्याझ्वलय् नवासें मूपाहां डा. वज्राचार्यं मदुम्ह प्रधानया च्वसुया उत्कृष्टता नापं वय्कः वय्कःया जहानलिसे नेपालभाषा विषय अध्ययन यानागु ईया लुमन्ति कनादीगु खः ।
लुम्बिनी विश्वविद्यालयया उपकुलपति प्रा. डा. हृदयरत्न वज्राचार्यं बुद्ध धर्मसम्बन्धी च्वसुया प्रवद्र्धन यायेत विश्वविद्यालयपाखें नं कुतः जुयाच्वंगु जानकारी बियादिल ।
समूहया सल्लाकार डा. त्रिरत्न मानन्धरं वंगु २२ दँ न्ह्यवंनिसें समूहपाखें थुकथं उत्कृष्ट बौद्ध च्वसुया च्वमिपिंत सिरपाः लःल्हायेगु ज्या वयाच्वनागु व आतकया दुने स्वीच्याम्ह च्वमिपिंत सिरपाः लःल्हायेधुंगु जानकारी बियादिल ।
ज्याझ्वलय् सिरपाः दाता तुलाधरलिसें निर्णायकमण्डलपाखें लोचनतारा तुलाधर व डा. गौतमवीर वज्राचार्यं नं नुगःखँ तयादीगु खः ।
LEAVE YOUR COMMENTS