स्वन्तिया तिथि विवादयात कयाः सहलह

येँ(नेपालभाषा टाइम्स)- नेपाल पञ्चाङ्ग निर्णायक समितिं थुगुसीया स्वन्तिया तिथि विवादयात कयाः सहलह ब्याकूगु दु । यल व ख्वपयापिंसं थःथःगु हे कथं निर्णय यानाः सार्वजनिक यायेवं समितिं नेवाः ख्यःया सरोकारवालातलिसे सहलह ब्याकूगु खः ।

समितिया नायः प्रा. श्रीकृष्ण ढुंगेलं थुगुसी कात्तिक ८ गते मंगलवाः ग्रस्तास्त सुद्र्यः ग्रहण लाःगुलिं वयां लिपाया प्यंगू प्रहरतक ग्रहण बारे यायेमाःगु शास्त्रीय नियमकथं निर्णय यानागु जानकारी बियादीगु दु । वय्कलं ग्रहण लाःगुलिं उकिया हे लिधंसाय् शास्त्रसम्मत निर्णय यानागु धयादीगु दु ।
समितिया दुजःलिसें वाल्मीकि विद्यापीठया धर्मशास्त्र विभागया प्रमुख प्रा. डा. देवमणि भट्टराईं ग्रहणया शास्त्री आधार मथुइकुसे थुगुसीया स्वन्तिया निर्णय जुइ मफइगु जूगुलिं उकिया हे लिधंसा तिथि क्वःछिनातःगु खः धयादिल ।

ज्याझ्वलय् समितिया कार्यकारी निर्देशक सूर्यप्रसाद ढुङ्गेल, नेवाः देय् दबूया नायः पवित्र वज्राचार्य, पञ्चाङ्गकार सिद्धिलक्ष्मी व्यञ्जनकार, हिरण्यवर्ण महाविहारया पुष्पराज वज्राचार्य, जोशी समाजया सुरेन्द्रगोविन्द जोशी, ख्वपया ज्योतिष कृष्णराज जोशी, यलया ज्योतिष कीर्तिमदन जोशी सहलह जारी हे याना तयेमाःगु व ठोस निष्कर्ष पिकायेमाःगु खँय् बः बियादीगु दु ।

उगु इलय् थप सहलह यायेगु व आकिवंनिसें थज्याःगु विषयय् पञ्चाङ्ग पिथने न्ह्यः हे सरोकारवालालिसे सहलह यायेगु समितिया अध्यक्ष अधिकारीं प्रतिवद्धता प्वंकादीगु दु ।