नेपालभाषाया न्हापांम्ह आधुनिक कवि पूर्ण वैद्य मंत

येँ- नेपालभाषा काव्य ख्यःया न्हापांम्ह आधुनिक कवि कथं नांजाःम्ह कवि पूर्ण वैद्य मंत । यलया निदान अस्पतालय् वासः याकु याकुं थौं बहनी वयकः मदुगु खः । कवि वैद्य वंगु गुंपुन्हि कुन्हु तिनि ८० दँया जन्मन्हि यानाः ८१ दँय् क्यंगु खः ।

वंगु वालय् कब्जियत जुयाः वयकःयात निदान अस्पताल भर्ना याःगु खः । अस्पताल भर्ना यानाःलि स्वाब परीक्षण याःबलय् कोरोना पोजिटिभ खने दयेवं वयकःयात कोरोनाया उपचार शुरु याःगु खः । तर उपचारय् सुधार मजुसेंलि वयकःयात भेन्टिलेटरय् तयाः वासः यायेमाःगु खः । तर भेन्टिलेटरय् तयाः वासः याकूसां स्वास्थ्य अवस्था धाःसा सुधार मजूगु खः ।

अस्पतालया चिकित्सकतय्सं धाः कथं वयकःयाके अक्सिजन मात्रा म्हो जुजुं वनाः न्ह्यपुइ तक अक्सिजन थ्यंकेत समस्या जूगु खः । न्ह्यपुइ अक्सिजनया मात्रा थ्यंकेगु सुधार मजुयाः वयकः मदुगु खँ धाःगु दु ।

कोरोना संक्रमणं मदुगु जुयाः कन्हय् नेपाली सेनाया कोरोना शव व्यवस्थापन युनिटपाखें वय्कःया अन्तिम संस्कार यायेगु तयारी यानाच्वंगु दु ।

मदुम्ह कवि वैद्यया जहान छम्ह जक दी ।

कवि पूर्ण वैद्यं नेपालभाषा काव्य ख्यलय् शैलीगत रुपं आधुनिक कविताया सिर्जना शुरु यानादीगु श्रय बियातःगु दु । वय्कःया न्हापांगु कविता सफू ‘सरासु’ यात ने.सं. १०८४ या श्रेष्ठ सिरपाः लल्हाःगु खः ।

वय्कःया ‘लः लः खः’ कविता मुना नेपालभाषा जक मखुसें खस नेपाली भाषाया साहित्यिक ख्यलय् तकं अतिकं नांजाःगु कृति खः । थ्व कृति नेपाली लगायत अंग्रेजी भासं नं अनुवाद जुयाः पिहां वयेधुंकूगु दु । अंग्रेजी भाय्या साहित्यकार वाइने एम्टिजं थुकिया अंग्रेजी अनुवाद यानादीगु खः ।
कवि वैद्यं कविता बाहेक आत्मपरक निबन्ध ख्यलय् नं उतिकं हे गहन सिर्जना यानादीगु दु । वय्कःया निबन्ध संग्रह ‘जि छगू अभिव्यक्ति युगया’ यात ने.सं. ११०१ या श्रेष्ठ सिरपाः लाःगु खः ।

वय्कःया ‘कविताया लागा’ नांगु साहित्यिक च्वसु मुना सफू नं पिहां वःगु दु ।

वय्कलं जापानी कवि सुन्तारो कानिकावाया कविता नं नेपालभाषां अनुवाद यानाः पिथनादीगु खः ।

लछि न्ह्यः तिनि वय्कःयात शितल निवासय् नेपाल प्रज्ञा प्रतिष्ठानया ग्वसालय् जूगु छगू ज्याझ्वःया दथुइ राष्ट्रपति विद्यादेवी भण्डारीं प्रज्ञा मातृभाषा साहित्य पुरस्कार लःल्हानादीगु खः ।

कवि वैद्ययात राष्ट्रिय प्रतिभा पुरस्कार, अस्वीकृत विचार पुरस्कार, साहित्य सन्ध्या पुरस्कार, ठाकुरलाल निबन्ध सिरपाः, नेवाः हना सिरपाः आदि थीथी सिरपाः व हनापौपाखें सम्मान यानातःगु दु ।

लिपांगु इलय् पुलि स्याइगु व मिखां बांलाक खने मदइगु समस्यां यानाः वयकः छेँनं पिहां मझासे छेँय् हे अप्वः च्वनेगु यानादीगु खः ।