धरानय् देय् दबूया तःमुँज्या न्ह्यात

उदेन न्हूसाय्मिपाखें

धरान- नेवाः देय् दबूया न्हय्क्वःगु तःमुँज्या सोमवाःनिसें धरानय् न्ह्याःगु दु । तःमुँज्याया झ्वलय् भानुचोकं छगू ¥याली पिकासें देय् चाःहीकाःलि भानुचोकय् तुं थ्यंकाः सभाय् हिउगु खः । नेवाः देय् दबूया नायः नरेश ताम्राकारया सभापतित्वय् जूगु ज्याझ्वलय् मूपाहां कथं देय् दबूया संरक्षण मल्ल. के सुन्दर व विशेष पाहां कथं संघीय मामिला मन्त्री राजेन्द्र श्रेष्ठं ब्वति कयादीगु खः ।

केन्द्रीय दुजः लिसें व्यवस्थापन समितिया प्रमुख अनिल मास्कें लसकुस यासें न्ह्याःगु सभाय् न्ववासें सल्लाहकार सरला कायस्थं स्वनिगलं पिने दकलय् अप्वः नेवाःत दुगु थाय् धरान हे जुइमाः धकाः दावी यानादिल ।

ज्याझ्वःयात सम्बोधन यासें मूपाहां मल्ल के. सुन्दरं देय् दबूया दुजःतय्सं हे नेवाः भाय् मल्हायेगु खःसा देय् दबूया औचित्य दइ मखु धयादिल । वय्कलं धयादिल, ‘नेवाः भाय् नेवाःतय्सं मल्हाःसा सुनां ल्हाइ ? थ्व खँय् स्पष्ट जुइमाः, छुं ई कायेफु तर भाय् सयेकेगु कुतः याये हे माः ।’

धरानय् नेवाःतय्त छप्पँ छधी यायेगु ज्याय् बालकृष्ण हलुवाई, लक्ष्मीबहादुर हलवाई व सरला कायस्थया तःजिगु योगदान दुगु खँ नं वय्कलं कुलादिल ।

उकथं हे विशेष पाहां संघीय मामिला मन्त्री राजेन्द्र श्रेष्ठं देय् दबूया नेतृत्व सर्वसम्मत रुपं ल्ययेमाः धासें प्रजातान्त्रिक पद्धति धयाच्वंतले देय् दबूया आन्दोलनयात मदयेक मगाःपिं मनूत पिने लाये फइगु खतरा दु धयादिल । मन्त्री श्रेष्ठं देय् दबूया अधिवेशनया झ्वलय् ब्वलनाच्वंगु स्वनिगः दुने व स्वनिगः पिने, नेवाः भाय् ल्हाये सःपिं व मसःपिं धकाः गुगु भ्रम ब्वलनाच्वंगु खः उकियात चीकेमाः धासें धयादिल, ‘देय् दबुली राजनीति याये मजिउ, तर राजनीतिक ढंगं ज्या धाःसा यायेमाः ।’
धरान उपमहानगरपालिकाया मेयर तिलक राईं आदिवासी आन्दोलनय् नेवाःतय् तःजिगु भूमिका दु धासें नेवाःतय्सं थ्व आन्दोलन मन्ह्याकूगु जूसा आदिवासी आन्दोलन थन तक मथ्यनीगु जुइ धयादिल । वय्कलं धयादिल, ‘धरानय् बस्ती विस्तार यायेगु ज्याय् नं नेवाःतय् तःधंगु योगदान दु ।’

संघीय सांसद कुमार राईं नेपाःया आदिवासी जनजाति आन्दोलन नेवाःतय्सं मल्ह्वंगु खःसा थौं आदिवासी जनजातिया आन्दोलन थन थ्यनी मखु धासें नेवाःतय्सं जातीय अधिकारया नितिं तःधंगु योगदान याःगु खँ धयादिल ।

ज्याझ्वलय् अखिल नेपाल भारतीय संगठनया अध्यक्ष सिद्धिनारायण श्रेष्ठं नं ब्वति कयादीगु खः । लिसें ज्याझ्वलय् थीथी ख्यलय् थीथी कथं योगदान याना वयाच्वंपिं नेवाः व्यक्तित्वपिं युद्धप्रसाद वैद्य, सरला कायस्थ, कृष्णबहादुर श्रेष्ठ, शेषनारायाण महर्जन व हितकरवीर सिंह कंसाकारपिंत हंगु खः ।

देय् दबूया औपचारिक ज्याझ्वः क्वचायेवं हे बन्द सत्र नं शुरु जूगु दु । बन्द सत्र शुरु जुइवं न्हूपिं पदाधिकारी मनोनयन यायेगु नितिं शुल्क क्वःछीवं उकियात कयाः विवाद जुयाच्वंगु खँ सीदुगु दु । न्हूगु नेतृत्व ल्ययेगु नितिं मनोनयन दर्ता यायेबलय् अध्यक्षया नितिं २० हजारंनिसें केन्द्रीय दुजः जुइपिंसं ५ हजार तका दर्ता शुल्क पुलेमाःगु खँय् विवाद जुयाच्वंगु खः ।

देय् दबूया नायः पदय् पवित्र वज्राचार्य, माइला बाबु द्यःला व चन्द्रलाल राजभण्डारी स्वम्हेस्यां उम्मेदवारी बीगु चर्चा जुयाच्वंगु दु । लिसें दावेदारत सकसितं समायोजन यानाः सर्वसम्मत नेतृत्व ल्ययेगु लागिं नं कुतः जुयाच्वंगु खँ सीदुगु दु । थ्व तःमुँज्यां देय् दबूया न्हूगु नेतृत्व नं ल्यज्या याइ ।