त्रिपिटकया मेगु त:जिगु सफू नेवा: भासं

यल – बुद्ध धर्मया प्रमुख ग्रन्थ त्रिपिटकया थीथी ब्व मध्ये थुगुसी हानं मेगु छगू महत्वपूर्ण सफू नेपालभाषां अनुवाद जुयाः पिहां वइगु जूगु दु । थनया वीर–पूर्ण पुस्तक संग्रहालयया लुखां अभिधम्र्म पिटकया महत्वपूर्ण ग्रन्थ ‘यमक’ पिहां वयेत्यंगु खः । विमलञाणी गुरुमांनं तःदँमछि बिकाः पाली भाषाया उगु सफू नेपालभाषां अनुवाद यानादीगु खः ।

थौंकन्हय् पाली भाय्या त्रिपिटकयात नेपालभाषां अनुवाद यानाः पिथनेगु ज्या यानाच्वनादीम्ह भाजु दुण्डबहादुर वज्राचार्यया पहलय् थ्वहे वइगु वैशाख २२ गते ‘पालि–नेपालभाषा विमोचन जुइबलय् तुं थ्व सफू नं विमोचन जुइ । ८०० स्वयां अप्वः पेज दुगु थ्व सफुली चित्त व चितसिक रुप निर्वाण बारे न्ह्यसः–लिसः शैलीं च्वयातःगु दु ।