ने. सं. ११४४ चौलाथ्व दशमी -

अमेरिकाय् नेवाः सछि ब्व पूवन

येँ- फेसबुकया माध्यमं संचालन जुयाच्वंगु खँल्हाबल्हा ज्याझ्वः ‘अमेरिकाय् नेवाः’ सछि ब्व पूवंगु दु । थ्व लसताय् नकतिनि अमेरिकाय् छगू विशेष ज्याझ्वः जुल ।

‘नेपालभाषा टाइम्स’ न्हिपौया व्यवस्थापन व ग्वाहालिइ नेपालभाषा टाइम्स अमेरिकां न्ह्यानाच्वंगु ‘अमेरिकाय् नेवाः’ ज्याझ्वः सछि ब्व पूवंगु लसताय् छगू तःजिगु ज्याझ्वः यासें थुकिया लसता हंगु खः ।
मूपाहांकथं झायादीम्ह नांजाःम्ह हास्य कलाकार मदनकृष्ण श्रेष्ठं त्वाःदेवाय् मत च्याकाः उलेज्या यानादीगु ज्याझ्वलय् खँल्हाबल्हा ज्याझ्वलय् झायादीपिं पाहांपिं सकसितं सगं बियाः लसकुस याःगु खः ।
‘अमेरिकाय् नेवाः’ ज्याझ्वः न्ह्याकादीम्ह नापं निर्माता प्रविण ताम्राकारं लसकुस यासें ज्याझ्वः सछिगू ल्याः पूवंकेत ताःलाःगु खँय् लसता प्वंकादिसें ज्याझ्वः ताःलाकेत व थनतक थ्यंकेत थीथी थासं ग्वाहालि यानादीपिं सकसितं सुभाय् नं देछानादीगु खः ।

नेवाः नसाज्वलंया ब्वज्यालिसें दबुलिइ समय्बजि ब्वज्या नं याःगु खःसा खँल्हाबल्हा ज्याझ्वलय् पाहांकथं झायादीपिंत ‘अमेरिकाय् नेवाः’ ज्याझ्वःया कार्यक्रम निर्देशक वरिष्ठ फोटोग्राफर राजीव श्रेष्ठया मां कमलादेवी श्रेष्ठ व ज्याझ्वः न्ह्याकामि ताम्राकारया तता नीलमदेवी तुलाधरं सगं बियादीगु खः । उगु इलय् लोककवि राजभाई जकःमिं चिनाखँ न्यंकादीगु खःसा सांस्कृतिक ज्याझ्वः नं जूगु खः । सांस्कृतिक ज्याझ्वलय् प्रतिशा प्रधानं हुलाप्याखं, सगुन ताम्राकार, प्रशान्त सिंह, सगुन श्रेष्ठं म्येँ न्यंकादीगु खःसा अनुज शाक्यं गितारवादनया प्रस्तुति बियादीगु खः ।

ज्याझ्वःया मेगु आकर्षणया रुपय् फेशन शो नं जूगु खः । फेशन डिजाइनर नितिमा लिम्बुं तयार यानादीगु थीथी डिजाइन पतासि व वसः पुनाः फेशन शो नं याःगु खः । ज्याझ्वःया दकलय् लिपा ब्वति कयादीपिं सकसितं नेवाः भ्वय् नकेगु ज्या जूगु खः ।

वंगु स्वदँ न्ह्यवंनिसें न्ह्यानाच्वंगु लय्लय्पतिकं न्ह्यानाच्वंगु ‘अमेरिकाय् नेवाः’ ज्याझ्वः प्रविण ताम्राकारं न्ह्याका वयाच्वनादीगु दुसा थुकिया संयोजन सुरेश किरण मानन्धरं याना वयाच्वनादीगु दु । अथे हे प्रविधि लगायत मेमेगु पक्षय् राजिव श्रेष्ठ, मार्कण्डेयमान सिंह प्रधान, आश्रय श्रेष्ठ, अनिल रंजित, मनिषा स्थापित ताम्राकार, केथ फेदरम्यान लगायतं ग्वाहालि याना वयाच्वनादीगु दु ।