स्वम्ह मेयरयात सम्मान यासें साहित्य नखः क्वचाल

किपू- थीथी ज्याझ्वः यासें प्यक्वःगु नेपालभाषा साहित्य नखः शनिवाः क्वचाल । पांगाया लाछिइ जूगु निन्हु कुन्हुया ज्याझ्वलय् येँ महानगरपालिकाया मेयर बिद्यासुन्दर शाक्य, यल महानगरपालिकाया मेयर चिरिबाबु महर्जन व किपू नगरपालिकाया मेयर रमेश महर्जन लिसें उपमेयर सरस्वती खड्का रिजालयात हनेगु ज्या नं जूगु खः । नेपालभाषाया माध्यमं स्थानीय विषय ब्वंकेगु व्यवस्था यानादीगुलिं वय्कःपिंत हनेगु ज्या जूगु खः ।

ज्याझ्वलय् न्ववासें येँ मनपाया मेयर विद्यासुन्दर शाक्यं नेपालभाषां ब्वंकेगु ज्या शुरु जूसां थुकियात धिसिलाकेगु लागिं अझ नं कुतः यायेमानिगु खँ कनादिल । यल महानगरपालिकाया मेयर चिरिबाबु महर्जनं यलय् थ्व विषय लागू याकेगु लागिं यक्वस्यां ग्वाहालि याःगु खँ कनादिल । किपू नगरपालिकाया मेयर रमेश महर्जनं आः ३ तगिं तक लागू जूगु थ्व विषय लिपा तना यंकेगु जुइ धयादिलसा उपमेयर सरस्वती खड्कां किपूयात सांस्कृतिक नगर दयेकेत थःपिंसं कुतः यानाच्वनागु खँ कनादिल । मूपाहां जनकवि दुर्गालाल श्रेष्ठं जनताया च्यः जूसा जक जनताया द्यः जुइ धयादिलसा नेवाः न्ह्यलुवा मल्ल के. सुन्दरं आः वइगु चुनावय् थ्वहे मेयर उपमेयरपिंत भोट बीत आह्वान यानादिल ।

ज्याझ्वलय् नेपालभाषा ब्वंकेज्यां साहित्यय् जुइगु तिबः बारे तुल्सीलाल सिं, गुजेश्वरी श्रेष्ठ व डा. वज्रमुनि वज्राचार्य लिसे अन्तक्र्रिया नं जूगु खः । अथे हे किपूया सांस्कृतिक सम्पदाया पर्यटकीय सम्भावनाबारे प्रयागमान प्रधान, राजमान ‘मानव’ व रमेशमान डंगोलिसे पत्रकार कल्पना महर्जनं अन्तरसंवाद यानादीगु खः । ज्याझ्वलय् साहित्य पाठ लिसें म्ये, प्याखं, ख्यालः नं न्ह्यब्वःगु खः ।