बालाजुइ मन्त्रीया छेँ न्ह्यःने प्रदर्शन

प्रदर्शनकारीतय्सं ब्वयेकूगु नेवाः ध्वाँय् छ्वयेका बिल

येँ (नेपालभाषा टाइम्स) – बालाजुइ जुयाच्वंगु सतक विस्तार विरुद्ध संघर्ष यानाच्वंपिं पीडिततय्सं म्हिगः बालाजुइ शहरी विकास राज्यमन्त्री रामवीर मानन्धरया छेँ न्ह्यःने प्रदर्शन यात । पीडिततय्सं अन राज्यमन्त्री मानन्धरया पुतला नं च्याकूगु खः । उपत्यकाव्यापी सतक विस्तार पीडित संघर्ष समितिया संयोजकत्वय् अन प्रदर्शन जूगु खः ।

प्रदर्शनकारीतय्सं अन उपत्यका विकास प्राधिकरणं थुना बिउगु छेँ दुगु जग्गाय् की तायेगुया नापनापं अन नेवाः ध्वाँय् नं ब्वयेकूगु खः । प्रदर्शनया झ्वलय् प्रदर्शनकारीतय्सं राज्यमन्त्री मानन्धरयात बर्खास्त यायेमाःगु, विस्तापित जूपिं स्थानीय जनतायात रोजगार सहित पुनर्स्थापना यायेमाःगु माग नं याःगु खः । की तायेगु व प्रदर्शन ज्याझ्वः क्वचायेकाः प्रदर्शनकारीपिं लिहां वनेवं अन छथ्वः मनूत वयाः प्रदर्शनकारीतय्सं तानातःगु की लीगु लिसें नेवाः ध्वाँय् च्याकेगु ज्या याःगु खँ सतक विस्तार पीडित संघर्ष समितिया नायः सुमन साय्मिं ‘नेपालभाषा टाइम्स’ यात कनादिल ।

आन्दोलनकारीतय्सं धाःसा थःपिनि आन्दोलन दबे यायेत राज्यपाखें गुण्डा परिचालन याःगु धकाः द्वपं बिउगु दु । संयोजक साय्मिं कनादी कथं वंगु झिंप्यन्हु न्ह्यवंनिसें अन पीडितत अनसन च्वनाच्वंगु खःसा थौं थ्व अनसनया अन्तिम न्हि खः । थ्वयां लिपा न्हूगु चरणया आन्दोलन न्ह्याकेगु खँ वय्कलं कनादिल ।

उगु थासय् सतक विस्तार यायेगु झ्वलय् सतकया दथुं जवय् ७ मिटर व खवय् ७ मिटर लँ तबाला यायेगु धकाः उपत्यका प्राधिकरणं हे निर्णय यानातःगु खःसां आः वयाः छखे जक लँ कयाः मेगुपाखे धाःसा थि हे मथिउगु धासें थ्व आन्दोलन जुयाच्वंगु खः । आन्दोलनकारीतय्सं राज्यमन्त्री मानन्धरं थःगु छेँ बचे यायेगु लागिं छखे जक लँ त्यला काःगु द्वपं बियाच्वंगु दु । आः डोजर चले यानाः गुगु छेँ थुनाछ्वःगु खः उगु छेँ थुने मते धकाः सर्वोच्च अदालतं आदेश बियातःगु दुसां नं ‘च्वय्या आदेश’ धकाः अन डोजर चले यानाच्वंगु द्वपं नं पीडिततय्सं बिउगु दु ।

आः न्हूगु कथंया आन्दोलन न्ह्याकेगु झ्वलय् कन्हसंनिसें सतक विस्तारया झ्वलय् जूगु आन्दोलनयात दमन याःगु किपा ब्वयेगु ज्या जुइ । आन्दोलनकारीतय्सं आः राज्यमन्त्री मानन्धरयात बर्खास्त यायेमाःगु माग यासें हस्ताक्षर संकलन यायेगु तयारी यानाच्वंगु खँ नं धाःगु दु। उकथं हे बागमती प्रदेशया सांसद लिसें जनप्रतिनिधितय् दथुइ नागरिक सुनुवाईया ज्याझ्वः नं यायेत्यंगु दु ।

थ्वहे झ्वलय् नेपाः राष्ट्रिय पार्टीपाखें नायः डा. विजय सैंजुं छगू वक्तव्य जारी यासें सतक विस्तारया नामय् विस्थापित जूपिं जनतायात उठिबास याये दइ मखु धकाः माग यानादीगु दु। थुकिं यानाः पिहां वइगु लिच्वःया जिम्मेवार नं राज्य हे जुइमालीगु ख्याच्वः नं वक्तव्यय् बियातःगु दु ।