नेवाः राष्ट्रिय मुक्ति मोर्चाया येँ महानगर सम्मेलन
येँ (नेपालभाषा टाइम्स)/ नेवाः राष्ट्रिय मुक्ति मोर्चाया न्हापांगु येँ महानगर सम्मेलन क्वचाःगु दु । सम्मेलनं मोर्चाया न्हूगु नेतृत्व ल्यसें नेवाः मुक्ति आन्दोलनयात अझ संगठित व योजनाबद्ध ढंगं न्ह्यःने यंकेगु घोषणा याःगु दु ।
सम्मेलनं ज्योति बज्राचार्यया नेतृत्वय् न्हूगु समिति ल्यःगु दु । समितिइ न्वकुलिइ न्हुच्छे कृष्ण श्रेष्ठ, किरण महर्जन व निर्मला सिं डंगोल, छ्याञ्जेय् गोपाल महर्जन, दांभरिइ मिन्दुरत्न बज्राचार्य, ल्यूछ्याञ्जेय् कृष्णलाल नकर्मि व ल्यूदांभरिइ सिता श्रेष्ठ निर्वाचित जूगु दु । अथेहे सचिवालय दुजः पदय् ज्ञानेन्द्र महर्जन व बसन्त श्रेष्ठ निर्वाचित जूगु दुसा ३३ म्ह मोर्चा महानगर कार्यसमिति दुजः ल्यःगु दु ।
सम्मेलनया उलेज्या माओवादी केन्द्रया स्थायी समिति दुजः शशि श्रेष्ठं त्वाःदेवाय् मत च्याकाः यानादीगु खः । ज्याझ्वलय् न्ववायेगु झ्वलय् मूपाहां श्रेष्ठं नेवाःतय्गु राजनीतिक, सांस्कृतिक व आर्थिक मुक्तिया संघर्ष अझं पूमवंनीगु न्ह्यथँसें नेवाः मुक्ति आन्दोलन केवल जातीय पहिचानतक सीमित मखसे मुक्कं समाजवादी आन्दोलननाप स्वानाच्वंगु खँय् बः बियादिल ।
सम्मेलनय् बागमती प्रदेशय् सरकारी ज्याखँय् नेपालभाषा व तामांग भाय् छ्यलेगु निंतिं भाषा ऐन २०८० हयेत नेतृत्वदायी भूमिका म्हितादीम्ह बागमती प्रदेशया पूर्व संस्कृति, पर्यटन तथा सहकारी मन्त्री शैलेन्द्रमान बज्राचार्ययात विशेष सम्मान याःगु खः । सम्मान ग्रहण यासें वय्कलं नेवाःतय्सं आवलिं योजनाबद्ध ढंगं आर्थिक उत्पादन व समृद्धिइ ध्यान बीमाः धयादिल । वय्कलं भाषा संस्कृति जक मखु , आर्थिक सबलता मदयेकं समाजवाद सम्भव मदुगु व योजनाबद्ध आर्थिक अभियानय् न्ह्यज्याये मफुसा नेवाः आन्दोलन पूवने मफइगु खँय् बः बियादिल ।
अथे हे माओवादी केन्द्रया स्थायी समिति दुजः विजय सैजुं आत्मनिर्णयया अधिकार, स्वशासन व स्वायत्तताया न्ह्यसःयात मोर्चां थःगु मू एजेण्डा दयेकेमाःगु खँ धयादिल ।
माओवादी केन्द्रया केन्द्रीय दुजः व नेवाः मोर्चाया इन्चार्ज दिलिप महर्जनं येँ महानगरय् च्वनीपिं नेवाःत समाज परिवर्तनया आधारशिला जूगु धयादिसें येँया नेवाःत मदंतले देशय् तःधंगु परिवर्तन सम्भव मजूगु व समाजवादी क्रान्तिया अग्रपंक्तिइ येँया नेवाःत दनाः नेतृत्व यायेमाःगु आवश्यकता दु धयादिल ।
अथेहे माओवादी केन्द्रया जिल्ला इन्चार्ज हिमाल शर्मां पार्टी नेवाःतय्गु हकहित व अधिकारया नितिं प्रतिबद्ध दु धयादिसें पार्टीया नेवाः–तामाङ जागरण अभियान निरन्तर जारी दुगु खँ कनादिल ।
सम्मेलनया उलेज्या सत्र ग्वसाः खलःया कजि धर्मदेव महर्जनया सभापतित्वय् जूगु खःसा बन्द सत्रय् निर्वाचन समितिया कजि मोर्चाया सल्लाहकार सरिता महर्जन जुयादीगु खः । निर्वाचन समितिया दुजलय् मोर्चाया केन्द्रीय नायो उमेश स्थापित व न्वकु कृष्णबहादुर महर्जन च्वनादीगु खः । बन्दसत्रय् सम्मेलन आयोजक समितिया कजि धर्मदेव महर्जनं न्ह्यब्वयादीगु राजनीतिक–सांगठनिक प्रतिवेदनयात संशोधन यासें अनुमोदन याःगु खः ।
न्हूम्ह निर्वाचित नायो ज्योति बज्राचार्यं थःगु सम्बोधनय् येँया नेवाःतय्सं फयेमालाच्वंगु भूमि विस्थापन, सांस्कृतिक सम्पदाय् जुयाच्वंगु अतिक्रमण व भाषिक–आर्थिक विभेदयात मू चुनौतीया रुपय् कयागु दु धयादिसें येँया नेवाःतय्त संगठित यानाः थज्याःगु अन्यायविरुद्ध संघर्षया कार्यक्रम हयेगु प्रतिबद्धता प्वंकादिल ।
LEAVE YOUR COMMENTS