ने. सं. ११४६ बछलाथ्व तृतीया - अक्षय तृतीया, भिक्षु प्रज्ञानन्द महास्थविरया १२६ क्वःगु बुदिं

तेज-तिर्थ ट्रष्टपाखें प्यंगू विधाय् सिरपाः

येँ – तेज-तिर्थ ट्रष्टपाखें दँयदसं थें थुगु दँय् नं थीथी विधाय् सिरपाः त्याकूपिनि नां घोषणा याःगु दु ।

ट्रष्टपाखें घोषणा याः कथं थुगु दँय् नेपालभाषा साहित्य व कला विधाय् योगेन्द्रमान श्रेष्ठयात सिरपाः बीगु निर्णय याःगु दु । अथे हे नेपालभाषा मिसा साहित्यकार कथं नारायणदेवी श्रेष्ठयात सिरपाः बीगु निर्णय याःगु दु ।

उकथं हे पत्रकारिता विधाय् निर्मला तुलाधर आचार्ययात व लोकतन्त्र एवं मानव अधिकार विधाय् शिव कंगालयात सिरपाः बीगु निर्णय याःगु दु ।
थ्व फुक्कं सिरपाः म्हतिं ५०-५० द्वः तकाया खः । थौंकन्हय् लागू यानातःगु लकडाउन खुल्ला जुइवं छगू समारोह यासें सिरपाः लःल्हाइगु ग्वसाः दु ।

पुलांम्ह राज्यमन्त्री लिसें नेपालभाषाह्यमि भाजु तिर्थराम डंगोलं थः व थः जहानया नामं थ्व ट्रष्ट स्वनादीगु खः । ट्रष्टपाखें नेपालभाषा साहित्य व कला, पत्रकारिता, मानव अधिकार व मिसा साहित्यकार यानाः प्यंगू विधाय् दँयदसं सिरपाः बीगु याना वयाच्वंगु दु । थुगुसी स्वक्वःखुसी सिरपाः बीत्यंगु खः ।