पीक्वःगु नेपालभाषा तःमुँज्या यःसिंख्यलय्

ख्वप(नेपालभाषा टाइम्स)- नेपालभाषा साहित्य तःमुँज्या थुगुसी यःसिख्यलय् याइगु जूगु दु । दँय्दसं कौलाथ्व द्वादशि व त्रयोदशि निन्हुयंकं जुया वयाच्वंगु तःमुँज्यां थुगुसी यःसिं ख्यलय् यायेगु क्वःछिउगु खः ।

नेपालभाषा साहित्य तःमुँज्या ग्वसाः खलःपाखें नेपाल संवत् ११०० (२०३७ साल)य् तालाक्व त्वालं शुरु जूगु थुगु साहित्यिक ज्याझ्वः ख्वपया थीथी त्वालय् दँय्दसं मदिक्क जुया वयाच्वंगु दु । थुगुसी तःमुँज्या जुइगु यःसिं ख्यलय् थ्व स्वयां न्ह्यः नं निक्वःतक यायेधुंकूगु दु । थनिं स्वीनिदँ न्ह्यः २०४८ सालय् न्हापांखुसी तःमुँज्याजूगु खःसा अनंलि २०६८ सालय् नं थ्व हे थासय् तःमुँज्या याःगु खः ।

यःसिं ख्यः द्यःला समुदायया बाहुल्यता दुगु थाय् खः । यःसिं ख्यलय् तःमुँज्या यायेगु निंतिं बलराम सिँबन्जारया अध्यक्षताय् पीस्वक्वःगु नेपालभाषा साहित्य तःमुँज्या ग्वसाः खलः नं नीस्वंगु दु ।

तःमुँज्या ताःलाकेत व ग्वसाः खलः नीस्वनेत आदर्श आजाद मावि भेलुख्यलय् च्वंगु बृहत मुँज्याय् नेपालभाषा साहित्य तःमुँज्या मूगुथिया आशकुमार चिकंबन्जार, नेपाल मजदुर किसान पार्टीया नायः नारायणमान बिजुक्छेँ रोहितं नुगःखँ तयादीगु खः ।