ने. सं. ११४६ बछलागा पञ्चमी -

साय्मितय् स्वयम्भू भ्वय् क्वचाल

येँ(नेपालभाषा टाइम्स)- देय्न्यंकंया साय्मित मुनाः न्यायेका वयाच्वंगु थुगुसीया स्वयम्भू भ्वय् वंगु शनिवाः जुल । केन्द्रीय मानन्धर संघपाखें दँय्दसं होलिपुन्हि लिपाया न्हापांगु शनिवाः न्यायेकेगु याना वयाच्वंगु दु । थुगुसी स्वयम्भू भ्वय्या व्यवस्थापन चामुन्डा मानन्धर गुथि वतु त्वालं याःगु खः ।
स्वयम्भू भ्वय्या हे झ्वलय् थुगुसी संघया ७० क्वःगु बुन्हि हनाज्याझ्वः नं याःगु खः । ज्याझ्वलय् वंगु बैशाखय् जूगु स्थानीय तह व मंसिरय् जूगु संघ व प्रदेशया निर्वाचनय् निर्वाचित जुयादीपिं मानन्धर समुदायया जनप्रतिनिधिपिंत हनेज्या नं याःगु खः ।

ज्याझ्वलय् बागमति प्रदेश सांसदलिसें पुलांम्ह मन्त्री वसन्तप्रसाद मानन्धर, द्वाल्खाया भीमेश्वर नगरपालिकाया प्रमुख ईश्वरनारायण मानन्धर, स्यांग्जाया हरिनास गाउँपालिका, काभे्रपलाञ्चोक, रामेछाप जिल्लया थीथी स्थानीय तहलिसें येँ महानगरपालिका, भ्वत नगरपालिका, दक्षिणकाली नगरपालिका, सक्व (शंखरापुर) नगरपालिका, ख्वप नगरपालिकाया निर्वाचिन जनप्रतिनिधियात नेवाः परम्पराकथं ख्यें सगं बियाः हनेज्या याःगु खः । लिसें वय्कःपित मतिनाया चिं नं लःल्हाःगु खः ।

थुकथं हे ज्याझ्वलय् २०७८ सालया एसइइ परीक्षानिसें थीथी विषयय् विद्यावारिधी यानादीपिंत थीथी सम्मान व सिरपाः नं लःल्हाःगु खः । थुगुसी कानुनय् विद्यावारिधी यानादीम्ह डा. सुरेन्द्र मानन्धर (किपू) व डा. उज्वल मानन्धरयात प्रा. रामभक्त –सानुनानी मानन्धर सिरपाः लःल्हाःगु खः ।
मदुम्ह द्वारिकानारायण व हिरादेवी मानन्धरया नामं वय्कःया छेँजःपिंसं नीस्वनादीगु झिद्वः तका दांया ‘सलिंचा मचा नेवाः सिरपाः’ मोडर्न नेवाः इंग्लिश स्कुलय् अध्ययनरत मिजंपाखें रिभान मानन्धर (एलकेजी) व मिसापाखे प्रणिता मानन्धर (युकेजी)यात लःल्हाःगु खः ।

ज्याझ्वलय् एसइइ, प्लस टु, बीबीए, बीई, कम्प्युटर विज्ञान, एमए, एमबीबीएसय् उत्कृष्ट ल्याः हयादीपिंत नं पदक व नगदसहितया सिरपाः लःल्हाःगु खः । गुहेश्वरीराज मानन्धर व भीमदेव मथुरा कुमारीं स्वना तयादीगु रत्नचुडामणि शिक्षा कोषपाखें विपन्नत अभिभावकया पहिचान यानाः न्याम्ह विद्यार्थीयात लःल्हायेगु याना वयाच्वंगु छात्रवृत्ति थुगुसी रामेछापया मानन्धर सेवा समाजयात लःल्हाःगु खः ।

थुगु दँय् ज्याःजंक्व क्वचायेकादीपिं नापं न्हू इहिपा याःपिं तिपूयात नं भिंतुना देछाःगु भ्वय्या झ्वलय् थीथी उद्यमी, व्यवसायी, वित्तीय संस्थाया प्रदर्शनी कक्ष लिसें हिदानलिसें स्वास्थ्य परीक्षणया नं शिविर संचालन याःगु खः ।

साय्मि समुदायया ऐतिहासिक महत्वया स्वयम्भू भ्वय्या व्यवस्थापन दँय्दसं छगू छगू त्वाः, गुथि, खलःपाखें भाला कयाः याना वयाच्वंगु दुसा भ्वजय् बजि, ख्यें, मरि, अय्लाः थ्वँ, धौ, खय् आदि छगू छगू त्वालं परम्परांनिसें व्यवस्था याना वयाच्वंगु दु ।

संघया उपसभापति बद्रीनारायण मानन्धरया सभापतित्वय् जूगु ज्याझ्वलय् समुदायया दकलय् ज्याथःम्ह शंकरलाल मानन्धर मूपाहांकथं झायादीगु खः । मूपाहांपाखें वतु मानन्धर सनाःगू खलःयात आकिवं भ्वय् व्यवस्थापनया निंतिं पाःब्वः पौ नं लःल्हानादीगु खः ।

ज्याझ्वलय् प्रदेश सांसद वसन्त मानन्धर, भीमेश्वर नगरपालिकाया प्रमुख ईश्वरनारायण मानन्धर, येँ महानगरया प्रवक्तालिसें १७ वडाअध्यक्ष नविन मानन्धर लगायतं नुगःखँ तयादीगु खः ।