ने. सं. ११४४ कौलाथ्व तृतीया -

भारतीय कम्पनीं यायमेफुगु ज्या अष्ट्रियाली कम्पनीं यात

माथिल्लो तामाकोशी जलविद्युत आयोजना

जिरी – दोलखाय् दयेकाच्वंगु माथिल्लो तामाकोशी जलविद्युत आयोजनाय् पेनस्टक पाइप जडान यायेगु सुरु जूगु दु । आयोजनाया लट २ अन्तर्गत क्वयेयागु व च्वयेयागु निगुलिं तस्वाःगु सुरुङ्गय् पेनस्टक पाइप जडान सुरु याःगु खः । ४५६ मेगावाट क्षमताया थ्व आयोजनाया लट २लय् भारतीय कम्पनी टेक्सम्याको रेल एण्ड इन्जिनियरिङ्ग लिमिटेडं यायेमफयेवं ज्या ब्वथलाः अष्ट्रियाली कम्पनी एन्ड्रिज हाइड्रो जिएमबीयात ज्या बिउगु खः ।

अष्ट्रेयाली कम्पनीं लत्या दुने हे पाइप जडान ज्या सुरु याःगु खः। आयोजनाया क्वय्या पेनस्टक साफ्टया पेनस्टक पाइप जडान व परीक्षणया ज्या एन्ड्रिजयात बिउगु खः । क्वय्या पेनस्टक साफ्टय् ३७३ मिटर तस्वाःगु सुरुङ्ग दु । आयोजनाया ३१० मिटरया च्वय्या तस्वाःगु सुरुङ्ग लिसें ल्यंदुगु ज्या टेक्सम्याकों हे यायेगु सहमति कथं टेक्सम्याकों नं पाइप जडान सुरु याःगु खँ आयोजनाया प्रवक्ता डा. गणेश न्यौपानें धयादीगु दु ।

निगुलिं साफ्टया पूवंक तयारी यानाः सुरुङ्गया च्वं क्वय्पाखे पाइप छ्वयाहयाः जडान सुरु याःगु खः । पाइप जडान सुरु जुइवं थ्व आयोजनां इलय् हे दयेके क्वचाइगु विश्वास दयावःगु खँ धाःगु दु ।

आयोजनाया लट २लय् भारतीय कम्पनी टेक्सम्याको रेल एण्ड इन्जिनियरिङ्ग लिमिटेडं यायेमफयेवं ज्या ब्वथलाः अष्ट्रियाली कम्पनी एन्ड्रिज हाइड्रो जिएमबीयात ज्या बिउगु खः

पेनस्टक पाइप ढुवानी व जडानया हे कारणं आयोजनाया उत्पादन ई लिज्यां वनाच्वंगुलिं आयोजनाया व्यवस्थापन, नेपाल विद्युत प्राधिकरण व ऊर्जा मन्त्रालयया पहलय् जूगु वार्तालिपा थ्व ज्या एन्ड्रिजयात बीगु सम्झौता याःगु खः । वंगु पुसया स्वंगूगु वालय् एन्ड्रिजयात क्वय्या पेनस्टक साफ्टया ज्या बीगु बारे त्रिपक्षीय सम्झौता जूगु खः ।

सिभिल लिसें मेमेगु ज्या अन्तिम चरणय् थ्यनेधुंकूसां लट २ या ठेकेदार टेक्सम्याकोया कारणं आयोजना लिबानाच्वंगु खः । टेक्सम्याकों आः थःम्हं याये धाःगु ज्या यायेमफत धाःसा थ्व ज्या नं एन्ड्रिजयात बीफइगु स्थिति दुगु खँ डा. न्यौपानें धयादीगु दु । टेक्सम्याकों आयोजनाया हाइड्रोमेकानिकल अन्तर्गत बाँध, इन्टेक व डिस्याण्डरय् गेट, स्टपलग, पेनस्टकपाइप आदिया डिजाइन, ढुवानी, परीक्षण व कमिसनिङ्गया ज्या याइ ।

थ्व आयोजनाय् ११३४ मिटर पेनस्टक जडान यायेमाः । पेनस्टक पाइप जडान यायेमफुगुलिं सिभिलपाखे ठेकेदार सिनो हाइड्रों यायेमाःगु कंक्रिटिङ्गया ज्या न्हापं दिनाच्वंगु खः ।वि.सं. २०७३ साउन निसें उत्पादन सुरु यायेगु लक्ष्य तयाः थ्व आयोजना दयेकूगु खःसा भुखाचं क्षति यायेवं संशोधन यानाः २०७५ असार निसें उत्पादन सुरु यायेग लक्ष्य तःगु खः, तर लट २ या हे कारणं थप ९ महिना बिउगु खः ।

थ्व इलय् नं पूमवनीगु खनेदुगुलिं आः २०७६ कात्तिक दुने परीक्षण उत्पादन यायेगु संशोधित कार्यतालिक दायेकूगु खः ।भुखाय्, नाकाबन्दी, अमेरिकी डलरया मूल्यबृद्धि, बजाः मू व ताःई काःगुलिं जुइगु प्रशासनिक खर्चया कारणं थ्व आयोजनाया ३५ अर्ब २९ करोड अनुमानित लागत नं अप्वया ब्याजलिसें निदुगं थ्यनीगु अनुमान दु ।

आयोजनां उत्पादन जुइगु मत प्रसारणया निंतिं विद्युतगृह गोङ्गर निसें खिम्ती तकया २२० केभी क्षमताया प्रसारण लाइनया ज्या नं जुयाच्वंगु दु । थौंकन्हय् प्यंगू लटय् ज्या जुयाच्वंगु दु ।

गुकी आयोजनाया सिभिल निर्माण चीनया सिनो हाइड्रो कर्पाेरेशन, हाइड्रोमेकानिकल भारत टेक्सम्याक्को रेल एण्ड इन्जिनियरिङ्ग लिमिटेड, इलेक्ट्रोमेकानिकल अष्ट्रियाया एन्ड्रिज जिएमबी व प्रसारण लाइन व सबस्टेशन दयेकेगु ज्या भारतया केइसी इन्टरनेशनल लिमिटेडं यानाच्वंगु दु । तरस फलासीइ दयेकेमाःगु सबस्टेशनया ज्या धाःसा लिबानाच्वंगु दु ।