छवाःया कारोवारय् नेप्से च्वय्

येँ – अर्थविज्ञ डा. युवराज खतिवडा अर्थ मन्त्री जूसां सुरुवातय् कुहां वःगु शेयर बजाः छवाःया कारोवार ल्याखं धाःसा थहां वंगु खनेदुगु दु । समग्र शेयर कारोवारया मापन याइगु नेप्से परिसूचक वाःया अन्त तकया दुन १०.७० अंकं थहां वनाः १३१५.१३ अंकं थ्यंगु दु । तर थ्व वालय् दां कारोवार धाःसा वंगु वाःया स्वयां ८.६१ प्रतिशतं म्हो जुल । थ्व वालय् १ अर्ब ७९ करोड ४७ लाख ९८ हजार तका बराबरया १७१ गू कम्पनीया ४७ लाख ९३ जार १२० कित्ता शेयर न्यायेमी जूगु खः । थ्व झ्वलय् छवाःयंकं २२४३७ गू कारोवार जूगु खः । वंगु वालय् १७४ गू कम्पनीया १ अर्ब ९६ करोड ३८ लाख ७१ हजार तका बराबरया ४५ लाख २६ हजार ५५० कित्ता शेयर न्यायेमी जूगु खः । समूहगतया ल्याखं थ्व वालय् होटल समूह, उत्पादन मूलक समूह व अन्य समूहया सूचक जक कुहांवंगु खः । थ्व वालय् दकलय् अप्वः बीमा समूह ७७.१९ अंकं थहां वःगु खःसा थ्व धुंकाः छसिकथं विकास बैंक समूह २८.४८ अंकं, व्यापार समूह १२.८४ अंकं, वाणिज्य बैंक समूह १६.२२ अंकं, जलविद्युत समूह ७.४ अंकं थहां वःगु खः ।

क वर्गया कम्पनीतय् मापन याइगु सेन्सेटिभ परिसूचक नं २.६६ अंकं थहां वयाः २७९.४६ अंकय् थ्यंगु दु । थ्व वालय् ११ करोड १८ लाख ६० हजार तकाया कारोवार यानाः नेपाल लाइफ इन्स्योरेन्स दकलय् अप्वः दां कारोवार याःगु कम्पनी जूगु दु । अथेहे २ लाख १ हजार कित्ता शेयर न्यायेमी जूगु सानिमा बैंक कारोवार शेयर ल्याःया आधारय् दकलय् न्ह्यःने लाःगु दुसा नेपाल लाइफ ११०८ गू कारोवार यानाः दकलय् अप्वः कारोवार जूगु कम्पनी जूगु दु ।