भारतया कारणं डलर भाः थहांवन

येँ – भारतीय अर्थतन्त्र कमजोर जुइवं उकिया लिच्वः नेपाःयात नं लाःगु दु । भारतीय ध्यबा निरन्तररुपं कमजोर जूगुलिं उकिया लिच्वः नेपाःयात लाःगु खः । गुकिया लिच्वः कथं अमेरिकी डलरया तुलनाय् नेपाःया ध्यबा नं कमजोर जुयावंगु खः ।
भारत व नेपाःया नोटय् स्थिर विनिमय जूगु लिच्वः नेपाःयात लाःगु खः ।

वंगु वैशाखं निसें अमेरिकी डलर निरन्तर रुपं थहां वनाच्वंगु दुसा नेपाःया ध्यबा धाःसा कुहां वनाच्वंगु दु ।अमेरिकाया फेडरल रिजर्व बैैंकं ब्याजदर अप्वयेकेवं भारतय् दुगु विदेशी लगानी अमेरिकाय् लिहां वंगुलि डलर संचिति म्हो जुयाः भारु कमजोर जूगु खः । वंगु मार्चय् १ डलर बराबर १०३।९५ तका जक दुगु डलरया भाः म्हिगः १०९।२२ तका थ्यंगु खः ।

गुकिया लिच्वः नेपालं आयात यायेमाःगु सामानया भाः नं थहां वंगु दु । अथेहे विदेशं कच्चा पदार्थ हयाः उत्पादन याइगु उद्योगया लागत अप्वगुलिं यानाः फुक्कं कथंया वस्तुया भाः थहांवंगु दु । डलरया भाः थहां वनेवं भारतं आयात जुयाच्वंगु पेट्रोलियम पदार्थया भाः नं थहां वनीगु खँ धाःगु दु ।